Imam Hussein (AS) ni Kielelezo cha Milele cha Kusimama Dhidi ya Dhulma
Kipindi bora cha maisha ya Imam Hussein (as) ni cha miaka sita wakati mtukufu huyo alipokuwa pamoja na babu yake, Mtume (SA). Imam Hussein (as) alijifunza maadili mema na maarifa juu ya kumjua Mwenyezi Mungu kutoka kwa baba yake Imam Ali (AS) na mama yake Bi Fatimatul-Zahra (as), ambao walilelewa na Mtume Mtukufu.
Imam Hussein alishiriki vilivyo katika matukio mbalimbali wakati Uislamu ulipokabiliwa na hatari. Daima alilinda turathi za thamani kubwa za Mtume kwa kutoa darsa na mafunzo kuhusu masuala mbalimbali yakiwemo ya kiitikadi, kifikra na kisiasa. Imam Hussein (AS) alichukua jukumu la kuuongoza umma wa Kiislamu mwaka 50 Hijria, baada ya kuuawa shahidi kaka yake Imam Hassan (AS). Hatimaye Imam Hussein (AS) aliuawa shahidi huko Karbala mwaka 61 Hijria wakati akitetea dini tukufu ya Kiislamu.
Kwa mnasaba wa kukumbuka kuzaliwa Imam Hussein (AS), IQNA imefanya mahojiano na Hujjatul Islam Mohammad Amin Pouramini ambaye amesema tabia na maisha ya Imam Hussein (AS) hayaishii tu katika tukio la Ashura, amesema msomi wa seminari. Ameongeza kuwa, kuanzia utotoni hadi ujana wake, na katika kukabiliana kwake na utawala wa Muawiyah, Imam (AS), kwa ujasiri, upeo wa kuona mbali, na roho ya kuelimisha, alisimama imara dhidi ya dhulma na upotovu. Alifanya ujumbe wa haki na ukweli kuwa wazi kwa watu wa zama zake,
Akirejea mfano wa mwenendo wa Imam Hussein (AS) katika kukabiliana na utawala wa Muawiyah, alisema: “Muawiyah alikuwa amefika Makka na Madina kwa ajili ya Hajj, na Imam Hussein (AS) alitoa hotuba huko Mina. Zaidi ya watu elfu moja walihudhuria, na katika hotuba hiyo Muawiyah alitajwa kama mtawala dhalimu.”
Aidha, Imam alitaja fadhila za Ahlul‑Bayt (AS) kama zilivyoainishwa katika Qur’ani na hadithi, kisha akawahutubia watu akisema: “Ninyi, bila kujali kabila lenu, fikisheni mambo yangu na maneno yangu kwa wengine.”
Habayo inayohusiana:
Kauli hii, alisema msomi huyo, inaonyesha umuhimu wa kutumia kikamilifu fursa adhimu za siku za Hajj na ardhi takatifu ya Mina ili kuwaelimisha watu na kufafanua ukweli kwa umma mpana wa Waislamu.
Msomi huyo alisema kuwa jambo la kuvutia, kwa mujibu wa simulizi za wanahistoria, ni kwamba wakati Imam Hussein (AS) alipotoa hotuba yake, masahaba pia walikiri kuwa wamesikia fadhila za Ahlul‑Bayt (AS) zikielezwa wazi katika zama zao.
Hujjatul Islam Pouramini aliongeza kuwa miongoni mwa misimamo mingine ambayo Imam Hussein (AS) alichukua dhidi ya Muawiyah ni lawama kali alizomwelekeza kuhusu kuuawa kwa Hujr ibn Adi na wenzake, tukio lililokuwa na athari kubwa katika historia ya mwanzo ya Uislamu.
“Muawiyah aliandika barua kwa Imam Hussein (AS), na Imam (AS) naye akajibu barua hiyo; maudhui ya barua hii ni makali na yenye ukali wa hoja,” alisema msomi huyo, akibainisha namna Imam Hussein (AS) alivyotumia kalamu kama chombo cha kusimama dhidi ya dhulma na kupotoshwa kwa haki.
Akifafanua maudhui ya barua hiyo, alisema: “Katika barua hiyo, Imam Hussein (AS) amemtaja Muawiyah kuwa ndiye anayewajibika kwa jinai ya kumuua Hujr ibn Adi na wenzake. Anasisitiza kuwa Hujr ibn Adi alikuwa miongoni mwa waja wema wa Mwenyezi Mungu, mtu wa utiifu wa kiungu, aliyesimama dhidi ya dhulma na maovu; lakini kwa sababu msimamo wake dhidi ya ukandamizaji wa serikali ya Muawiyah haukuvumilika kwake, alimfanya auawe shahidi.”
Hujjatul Islam Pouramini aliongeza kuwa Imam (AS) alimkabili Muawiyah kwa kumwambia kuwa miongoni mwa makosa yake makubwa ni kuwafukuza watu kutoka Madina na kutoka katika ardhi yao ya asili hadi nchi za kigeni; na kwamba alilazimisha watu watoe kiapo cha utii kwa mwanawe mlevi na mcheza kamari kwa nguvu, vitisho na shuruti, na hivyo kuwasaliti watu katika masuala ya uongozi na utawala.
Msomi huyo wa seminari aliendelea kusema: “Tukiviweka vyote hivi pamoja, hitimisho ni kwamba Imam Hussein (AS) alikuwa akijitahidi kubainisha ukweli na kuhoji utawala ulioporwa na Muawiyah. Hii pia inaonyesha kuwa nafasi hii ni mahsusi kwa wale ambao Mtume wa Mwenyezi Mungu (SAW) aliwateua kuwa warithi wake, yaani Ali ibn Abi Talib (AS) na kizazi chake, Maimamu wasio na makosa (AS), na kwamba Muawiyah alipora ukhalifa uliokuwa haki ya Ahlul‑Bayt (AS).”
3496148
