Ahmad Nu‘aynah: Ugumu wa kazi ya tiba haukunizuia kujishughulisha na Tilawa ya Qur’ani

IQNA-Qari mashuhuri wa Misri,  Daktari Sheikh Ahmad Nu‘aynah, amesema kuwa kazi yake ya udaktari haijawahi kumzuia kujishughulisha na usomaji wa Qur’ani Tukufu.

Kwa mujibu wa ripoti iliyonukuliwa kutoka Al‑Hay’ah Al‑Wataniyyah lil‑I‘lam, Daktari Ahmad Nu‘aynah, ambaye ni daktari bingwa wa watoto, katika mahojiano na kipindi kiitwacho “I‘tirāf Mu’ajjil” (Ungamo Lililocheleweshwa) amesema kuwa programu ya serikali iitwayo Tilāwah imepata mafanikio makubwa kwa kugundua vipaji bora na maqari mahiri, na imeleta mambo mengi ya kushangaza.

Alisema kwamba baadhi ya maqari hao tayari alikuwa akiwafahamu, na akaeleza matumaini yake kuwa Redio ya Qur’ani ya Misri itawaamini na kuwapa fursa ili sauti zao zisikike kwa watu kila mahali.

Aidha amesisitiza: “Ugumu wa kazi ya udaktari haujawahi kuwa kizuizi cha mimi kuzingatia kisomo cha Qur’ani. Siri yake imo katika nidhamu, kupanga ratiba na kutumia muda kwa utaratibu.”

Akaongeza kuwa tangu asubuhi hadi saa kumi jioni huwa anashughulika na kazi ya udaktari, kisha baada ya hapo huenda kwenye shughuli za kisomo cha Qur’ani ambazo mara nyingi hufanyika nyakati za jioni na usiku.

Habari inayohusiana

• Sheikh Nu‘aynah wa Misri asoma aya za Surat Al-Muzzammil kwa pumzi moja + Video

Daktari Nu‘aynah aliendelea kusema: “Nilijifunza kusoma Qur’ani tangu utotoni kwa mwanamke mwalimu aliyeitwa Ummu al‑Sa‘d. Kila baada ya Swala ya Alfajiri nilikuwa nikimwendea kwa muda wa saa moja ili kujifunza qirā’ah. Baada ya kumaliza masomo ya shule niliingia katika Chuo cha Tiba kusomea udaktari, hali ya kuwa tayari nilikuwa nimehifadhi Qur’ani Tukufu yote.”

Mwishoni mwa mahojiano yake alitamani watu wanufaike kwa kadiri iwezekanavyo na usiku wa Laylatul‑Qadr, na akaiombea Umma wa Kiislamu kheri na baraka katika siku za Mwezi Mtukufu wa Ramadhani.

4341910