قطر؛ بین الاقوامی «قرآن و دانش انسانی» سیمینار
ایکنا نیوز - وزارت اوقاف و امور اسلامی اور یونیورسٹی آف قطر کی جانب سے یکم اکتوبر 2025 (۹ محرم) کو قطر میں دو بین الاقوامی کانفرنسیں منعقد ہوں گی۔ ایک کانفرنس قرآن کریم اور انسانی علوم کے تعلق پر مرکوز ہوگی، جس کا عنوان ہے: "قرآن اور دانش بشری؛ دانشِ حکیمانہ کی جانب" اور اس کا شعار قرآن کریم کی آیت (اسراء، ۹): "يهدي للتي هي أقوم" یعنی "[لوگوں کو] اس دین کی طرف ہدایت کرتا ہے جو سب سے زیادہ پایدار ہے" رکھا گیا ہے۔ دوسری کانفرنس بعنوان "کتاب امت؛ روشنی بخش شراکتیں اور نئی دریافتیں" منعقد کی جائے گی۔
پہلی کانفرنس "قرآن اور علوم بشری" میں اسلامی دنیا کے مختلف ممالک سے 18 سے زائد محققین شریک ہوں گے۔ اس کا مقصد یہ ہے کہ قرآن کریم کو انسانی اور سماجی مکالمے کی تشکیل اور رہنمائی میں دوبارہ مرکزیت دی جائے تاکہ دینی علوم اور سماجی و انسانی علوم کے درمیان موجود فاصلے کو کم کیا جا سکے۔
اس کانفرنس کے دیگر مقاصد میں یہ شامل ہیں:
دنیا بھر کے مسلمان محققین کو قرآن کے معانی کے استخراج اور ان کی موجودہ انسانی علوم کے تناظر میں تنظیم کے لیے آمادہ کرنا۔
ان معانی کو وحی کے کلام کے ساتھ جوڑنا اور ان سے سماجی و انسانی مظاہر کے تجزیے میں استفادہ کرنا تاکہ اسلامی نقطۂ نظر کو تقویت دی جا سکے۔
دینی علوم کی تحقیق میں سماجی و انسانی علوم کے ثمرات کو بروئے کار لانا۔
یہ سلسلہ قطر میں سالانہ قرآن و علوم بشری کانفرنسوں کی پہلی کڑی ہے، جو قرآن کریم کے کردار اور اثرات کو چار بڑے شعبوں میں جانچنے پر توجہ دے گی: تعلیمی علوم، سماجی علوم، نفسیاتی علوم اور معاشی علوم۔
یہ کانفرنس دینی، سماجی اور انسانی علوم کے محققین کو اس بات کی ترغیب دے گی کہ وہ انسانی و سماجی علوم کے ساتھ منظم انداز میں تعامل کریں اور اس میں علمی سرمایہ کاری کریں۔
دوسری کانفرنس "کتاب امت" کے عنوان سے منعقد ہوگی، جس کا مقصد اسلامی ثقافتی بیداری، مسلمانوں کو ان کے رسالتی فرائض سے آگاہ کرنا، اور موجودہ دور کے چیلنجز کا ادراک و مقابلہ کرنے کے طریقوں پر رہنمائی فراہم کرنا ہے۔ اس اجلاس میں آٹھ تحقیقی مقالات پیش کیے جائیں گے۔
یہ پروگرام ایک اسٹریٹجک ثقافتی منصوبہ قرار دیا جا رہا ہے جس کا ہدف اسلامی اقدار کی روشنی میں ایک متوازن اور حالات حاضرہ سے باخبر مسلمان شخصیت کی تشکیل ہے۔/
4307507
