Wizi wa Hati za Kiislamu: Jaribio la Wazayuni la kufuta utambulisho wa Waislamu
Taarifa zinasema wanajeshi wa Israel wamekuwa wakiandamana na vikundi vya wataalamu wa vitu vya kale ili kuiba nyaraka na hati zote za kale za Kiislamu kutoka vijiji na miji ya Palestina.
Mshtuko na maswali, vikichanganyika na shutuma na hasira, ndivyo vilivyodhihirishwa kwenye mitandao ya kijamii na Wamoroko wanaopinga uhusiano wa kidiplomasia na Israel, baada ya Maktaba ya Kitaifa ya Israel kuweka picha nadra ya hati ya Kiislamu ya Moroko ya zaidi ya karne 10 kwenye tovuti na ukurasa wake.
Kile kilichoongeza hasira na kuchukizwa kwao ni kwamba mkurugenzi wa kumbukumbu za kihistoria wa Moroko alichapisha tena picha ya hati hiyo kwenye ukurasa wake, akinukuu kutoka maktaba hiyo hiyo.
Ingawa hili halikuwa tukio la kwanza la aina yake katika maktaba inayoendeshwa na Wazayuni, limeibua upya suala la kupotea na kuibwa kwa hati za thamani kutoka nchi zao za asili na kupatikana sehemu nyingine.
Profesa Abdel-Samad Belkabeer wa chuo kikuu cha Moroko anasema kuwa wizi wa hati hii muhimu ya Moroko hauhusiani tu na harakati ya Kizayuni duniani, bali inalenga kudhalilisha mataifa kwa njia yoyote ile.
Katika ardhi ya Palestina, anasema, harakati hii ya Kizayuni inalenga kuonesha kuwa ina haki ya kumiliki ardhi na kila kitu kilichomo, hata ikiwa kwa mwonekano wa kiutamaduni.
Ahmed Weihman, mkuu wa Shirika la Kitaifa la Uangalizi wa Mahusiano, ana hofu kwamba huenda hati hiyo ni ile ile ya Moroko iliyokuwa imeandikwa kwa dhahabu na Sultan Abul Hassan wa ukoo wa Beni Mirin wa Moroko, aliyohifadhi katika Msikiti wa Al-Aqsa na kuipa zawadi kwa Salahuddin (Saladin).
Anasema kuna nyaraka nyingi nyingine za Moroko katika maktaba ya Wazayuni, jambo linaloashiria wizi wa urithi wa kitamaduni na kistaarabu wa Wamoroko, na hivyo mamlaka zote za Moroko zinapaswa kuwajibika.
Kuhusu nini kinaweza kufanyika ili kurejesha hati hizi, anasema ni jukumu la Moroko kujaribu kuzirejesha, hata kama ni kwa kuzinunua kwa kuwa zina thamani kubwa. Anasisitiza kuwa ikiwa hatua hiyo itachukuliwa, sheria za kimataifa pia zitaunga mkono Moroko.
Weihman anazitaka taasisi husika nchini Moroko kuwasilisha ombi la dharura kimataifa kurejesha kilichoibwa kutoka kwenye kumbukumbu za sehemu mbalimbali za Jirani za Wamoroko katika Al-Quds (wakati wa Vita vya Siku Sita vya 1967).
Rizwan Amr, mkurugenzi wa Kituo cha Hati na Urithi wa Kiislamu cha Msikiti wa Al-Aqsa, anasema mtu anapotembelea maktaba hiyo au kuvinjari kumbukumbu zake, anashangazwa na wingi wa hati za Kiarabu na Kiislamu zilizomo humo.
Anashangaa: Je, ni vipi hati hizi za ajabu, ambazo hazina mfano duniani katika ulimwengu wa Kiislamu, ziliishia katika maktaba zinazodhibitiwa na utawala wa Kizayuni?
Anasema kwamba hati za Quds hasa na Palestina kwa ujumla, zilizoathiriwa na vita vya Msalaba na mabadiliko ya kisiasa Palestina, pia ziliathiriwa na hali ya kisiasa na uvamizi wa Israel.
Anabainisha kuwa wavamizi wa Kizayuni walitumia mbinu mbalimbali kukusanya hati hizi, nyingine kwa kununua na nyingine kwa wanajeshi walioivamia eneo hilo wakati wa vita vya 1948 na 1967.
Wanajeshi hawa waliandamana na vikundi vya wataalamu wa kale kuiba nyaraka zote na hati kutoka vijiji na miji ya Palestina, pamoja na misikiti na maktaba. Hati hizi zote zilihamishwa hadi kwenye kumbukumbu za wavamizi, zikiwemo maktaba za kitaifa.
Anasema, wizi huu haukushia kwenye nakala moja ya Qur'an, bali kuna mikusanyiko ya nakala za Qur'an za ajabu zilizoletwa Palestina kutoka sehemu mbalimbali za Moroko, Syria, na kwingineko.
“Hati hizi zilihifadhiwa katika maktaba za Palestina lakini sasa zinaonyeshwa katika maktaba ya kitaifa ya Israel.”
Anasema, “Tumepata kwenye maktaba hati zinazoitwa ‘Uumbaji wa Ulimwengu,’ ambazo ni maandiko ya mawazo yanayohusishwa na Ibn Taymiyyah. Kwa mujibu wa mtafiti aliyeyapata, hakuna nakala nyingine ya kitabu hiki duniani.”
Anabainisha kuwa kuna hati muhimu sana ambazo bado hazijagunduliwa kwenye maktaba hizi, kwani Waisraeli wanaonyesha sehemu ndogo tu ya vitabu hivi. “Tunajua kuwa kuna angalau hati 40,000 za Kiarabu na Kiislamu katika maktaba za utawala wa Kizayuni.”
Kwa mujibu wa Amr, majanga makubwa “yameikumba urithi wetu wa hati, nyaraka na historia yetu, pamoja na ardhi na watu wetu. Hati hizi sasa zimefungwa katika maktaba za wavamizi.”
Anasema, “Tunayo sera katika Msikiti wa Al-Aqsa kwamba tunajaribu kupata upatikanaji wa hati zote zilizowekwa wakfu kwa Msikiti wa Al-Aqsa au maktaba zinazouzunguka. Tunajaribu kuzipata, kuzisajili na kuzirudisha. Kwa hivyo, tupo kwenye mawasiliano na familia zilizo ndani ya al-Quds kurejesha hati hii kwenye Jumuiya ya Kiislamu ya Misaada ili ihifadhiwe na kutunzwa katika Kituo cha Marekebisho ya Hati cha Msikiti wa Al-Aqsa.”
3492935
