Watu Kadhaa Wajeruhiwa Katika Mlupuko Msikitini Shule ya Jakarta, Chanzo Chachunguzwa

IQNA – Takriban watu 54 wamejeruhiwa kufuatia mlipuko uliotokea katika msikiti ulioko ndani ya eneo la shule jijini Jakarta, mji mkuu wa Indonesia, siku ya Ijumaa, kwa mujibu wa taarifa za polisi wa eneo hilo.

Kamanda wa Polisi wa Kaskazini mwa Jakarta, Asep Edi Suheri, alieleza kupitia mkutano wa waandishi wa habari uliotangazwa moja kwa moja kuwa mlipuko huo ulitokea katika msikiti wa Shule ya Sekondari ya Serikali ya Juu ya 72 (SMA Negeri 72) majira ya saa sita na nusu mchana kwa saa za huko (0530 GMT).

Amesema kuwa kwa mujibu wa taarifa za awali, watu 54 waliathirika, baadhi wakipata majeraha madogo hadi ya wastani, huku wengine wakiruhusiwa kutoka hospitalini baada ya matibabu ya haraka.

Mamlaka bado hazijabaini chanzo halisi cha mlipuko huo. Suheri alieleza kuwa uchunguzi unazingatia uwezekano kadhaa. Kwa mujibu wa gazeti la Jakarta Globe, uchunguzi unazingatia hitilafu ya umeme, kifaa cha kielektroniki kilichoharibika, au kifaa cha mlipuko kilichotengenezwa kienyeji.

Mashuhuda walieleza hali ya taharuki baada ya mlipuko huo. Kwa mujibu wa Jakarta Globe, mlipuko ulitokea nyuma ya ukumbi mkuu wa msikiti, na kusababisha waumini kukimbia kwa hofu kutafuta usalama.

Waathirika wengi walipata majeraha yasiyo ya kutishia maisha kutokana na vipande vya vioo vilivyovunjika na mshtuko wa mlipuko.

"Khutba ilikuwa imeanza tu ndipo tukasikia mlio mkubwa," alisema Budi Laksono, mwalimu wa hisabati aliyekuwa ndani ya msikiti wakati huo. "Moshi ulijaa haraka ndani ya ukumbi. Wanafunzi walikimbia—baadhi walikuwa wakilia, wengine wakaanguka kwa hofu."

Maafisa wa polisi na vikosi vya dharura wamefunga eneo hilo huku uchunguzi ukiendelea ili kubaini chanzo halisi cha tukio hilo.

3495304/