Mkutano wa Istanbul Wasisitiza Kufikiria Upya Nafasi ya Misikiti

IQNA – Mkutano wa 4 wa Kimataifa kuhusu Usanifu wa Misikiti wa mwaka 2025 uliofanyika mjini Istanbul, Uturuki, umesisitiza haja ya kufikiria upya nafasi ya misikiti katika jamii za kisasa.

Mkutano huo uliandaliwa kuanzia tarehe 4 hadi 6 Novemba 2025 na Tuzo ya Abdullatif Al Fozan kwa Usanifu wa Misikiti kwa kushirikiana na Chuo Kikuu cha Ufundi cha Istanbul.

Uliwakutanisha wasomi, watafiti wa kielimu, wataalamu wa kimataifa na taasisi maalum kutoka sehemu mbalimbali duniani.

Katibu Mkuu wa Tuzo hiyo, Meshary Al-Naeem, alieleza kuwa kaulimbiu ya mkutano huo, “Kufikiria Upya Msikiti,” ni mwito wa dhati wa kutathmini tena nafasi ya msikiti katika jamii, hasa kwa kuzingatia mabadiliko ya kisasa katika usanifu na maisha ya kijamii.

Alifafanua kuwa lengo kuu la mkutano huo ni kukuza maarifa, kubadilishana uzoefu, na kuangazia mbinu bora za kimataifa katika kubuni na kuendeleza misikiti.

Ratiba ya mkutano ilijumuisha vikao vya kielimu, meza za majadiliano, na uwasilishaji wa tafiti maalum zilizochambua hali ya sasa ya usanifu wa misikiti.

Pia kulifanyika warsha zilizolenga uzoefu wa Uturuki na vipengele vya kielimu na kijamii vya usanifu wa misikiti, hasa kwa misikiti inayolenga watoto.

Aidha, mkutano huo uliambatana na kuchapishwa kwa kitabu kilichopewa jina la Kufikiria Upya Usanifu wa Misikiti, kilicho katika juzuu mbili zenye jumla ya kurasa zaidi ya 1,740 za tafiti zilizopitiwa na wataalamu, kikilenga kuwa rejea muhimu kwa wanafunzi, watafiti na wapenda usanifu wa Kiislamu.

3495296/