Maldivi Kuweka Matawi ya Kituo cha Qur'ani kwenye kila kisiwa nchini humo

IQNA – Serikali ya Maldivi (Maldives) inakusudia kuanzisha matawi ya Kituo cha Qurani katika visiwa vyote vya nchi hiyo.

Rais Mohamed Muizzu alisema kuwa matawi hayo yataanzishwa ndani ya kipindi kilichosalia cha utawala wake.

Amesema kuwa miundombinu itajengwa kulingana na ukubwa wa idadi ya watu wa kila kisiwa, eneo la ardhi lililopo, na rasilimali zilizopo za miundombinu.

“Kuna pia visiwa vyenye watu wachache sana na vingine vyenye changamoto za nafasi. Nimezungumza kuhusu jambo hili nikizingatia hali hizo,” alisema.

Akibainisha kuwa kampasi za Chuo Kikuu cha Kiislamu tayari zimeanzishwa kote nchini, Muizzu alisisitiza dhamira ya serikali ya kuendeleza elimu ya Kiislamu.

“Tunataka kuongeza elimu ya Kiislamu na kufundisha Uislamu kwa uthabiti tukiuunganisha na nyakati za kisasa. Hatuhitaji kutazama kwingine kwa hili, Uislamu ndio suluhisho. Ndiyo maana serikali hii inapewa kipaumbele cha kufundisha Uislamu kama ulivyo,” alisema.

Rais wa Maldivi pia alifichua kuwa ardhi imetolewa kwa Wizara ya Mambo ya Kiislamu kwa ajili ya ujenzi wa jengo maalum la Waqf kwa Qur'ani. Jengo hilo, litakalojengwa kwa msaada wa serikali, litatoa huduma mbalimbali za kidini.

Maldivi, kwa jina rasmi Jamhuri ya Maldivi, ni taifa dogo la visiwa katika Asia Kusini, lililo katika Bahari ya Arabia ndani ya Bahari ya Hindi.

Uislamu ni dini ya taifa la Maldives, na kuifuata kisheria ni sharti kwa raia wake.

Kati ya visiwa vyote 1,192 vya Maldivi, 187 ni makazi ya watu.

3494750