Watu 3,100 washiriki Itikafu katika Msikiti wa Jamkaran, Iran

IQNA – Naibu mkurugenzi wa kitamaduni wa Msikiti wa Jamkaran mjini Qom, Iran, amesema zaidi ya watu 16,000 wamesajiliwa kushiriki katika ibada ya Itikafu ya mwezi wa Rajab.

Hujjatul Islam Hosseinabadi aliongeza kuwa takribani watumishi 200 wa msikiti wako kazini kutoa huduma kwa washiriki wa Itikafu.

 Akizungumzia programu za kiutamaduni katika siku hizi, alibainisha kuwa huku wakihifadhi utulivu na hali ya kiroho ya washiriki, zimetayarishwa shughuli kama vile sherehe ya kumbukumbu ya kuzaliwa kwa Amirul-Mu’minin (AS), maadhimisho ya shahada ya Bibi Zaynab (SA), tilawa ya Qur’an Tukufu, utekelezaji wa amali za Umm Dawud katika siku ya mwisho ya Itikafu, pamoja na vipindi vya makaribisho na kuaga, usomaji wa vitabu, midahalo ya kielimu, na programu maalum zinazojikita katika mafundisho ya Qur’ani, Nahj al-Balagha na Sahifa al-Sajjadiyah.

Amesema kuwa kwa amri na msisitizo wa msimamizi mkuu wa msikiti, kila mwaka hufanyika jitihada za kuongeza uwezo na ubora wa ibada ya Itikafu katika Msikiti wa Jamkaran. Aidha, mbali na Itikafu za mara kwa mara na za msimu kwa makundi mbalimbali, msikiti huu huandaa hafla mbili kubwa za Itikafu kila mwaka: moja katika mwezi wa Rajab na nyingine kwa mujibu wa Sunnah ya Mtume Muhammad (SAW) katika siku kumi za mwisho za mwezi mtukufu wa Ramadhani.

Itikafu ni urithi wa Mtume Muhammad (SAW) na Ahlul-Bayt wake, na inachukuliwa kuwa ibada yenye thawabu kubwa katika Uislamu. Ni ibada ya kiroho inayohusisha kukaa msikitini kwa siku kadhaa, kufunga na kusali kwa ajili ya Mwenyezi Mungu. Kawaida hufanyika katika tarehe 13, 14 na 15 za Rajab, mwezi wa saba katika kalenda ya Kiislamu, ambazo mwaka huu ziliangukia Januari 3, 4 na 5.

3495944