Vipengele muhimu vya programu ya Qur’ani ya Misri Dawlat al-Tilawa
Ni mashindano maalumu ya vipaji vya kisomo cha Qur’ani katika nchi ya Kiarabu, na ndicho shindano kubwa zaidi la kutafuta vipaji vya kisomo na Tajweed nchini Misri. Kimeandaliwa kwa ushirikiano na Wizara ya Awqaf na Kampuni ya United Media Services, kwa lengo la kutambua vipaji na wasomaji mashuhuri kutoka mikoa mbalimbali ya nchi.
Kikihusishwa na mtangazaji Aya Abdelrahman, Dawlat al-Tilawa kimechukuliwa kama hatua ya kihistoria katika kuunga mkono vipaji vya Qur’ani, kufufua shule ya kisomo ya asili ya Kimasri, na kuimarisha nafasi ya Misri kama taa ya ufanisi wa Qur’ani na elimu ya dini yenye mwanga.
Munafisah ya Kuvutia
Miongoni mwa matukio yaliyovutia katika kipindi hiki ni kisomo cha Munafisah , yaani kusoma Qur’ani kwa zamu, kilichofanywa na Muhammad Ayoub Asif, qari mashuhuri kutoka Uingereza, na Muhammad Hassan Al-Qalaji, mshiriki wa Kimasri mwenye umri wa miaka 12 anayejulikana kama “muujiza wa Sharqiya.” Kisomo chao kilipokelewa kwa shangwe na heshima kubwa kutoka kwa majaji na watazamaji, na kilienea haraka katika mitandao ya kijamii.
Ayoub Asif, ambaye ni mzaliwa wa Pakistan na aliwahi kucheza mpira wa miguu katika klabu ya Arsenal, alihama Cairo na kujifunza kanuni za kisomo katika maqamat mbalimbali kwa miaka kumi. Leo hii ni miongoni mwa qari wanaopendwa sana katika ulimwengu wa Kiarabu.
Qari na Hafidh Kijana
Mohammad Ahmad Hassan, kijana mwenye umri wa miaka 19 na hafidh wa Qur’ani, alitoa kisomo cha kuvutia kutoka Surah Yusuf. Alianza kuhifadhi Qur’ani akiwa na miaka mitatu na akakamilisha kuhifadhi akiwa na miaka minane kwa msaada wa familia na walimu wake. Sauti yake yenye ladha na uthabiti wa tajweed viliwafanya majaji na watazamaji kumwona kama kielelezo bora cha kizazi kipya cha wasomaji wa Qur’ani.
Umaarufu Mitandaoni
Kipindi hiki kimekuwa gumzo katika mitandao ya kijamii kama X na Google, kikiongoza orodha ya vipindi maarufu nchini Misri na katika nchi za Kiarabu kama Kuwait, Qatar na Jordan. Matukio ya kugusa moyo, kama machozi ya mshiriki Yousef Abdul Aziz wakati wa kisomo, na busu la heshima kwa mkono wa Qari Muhammad Ahmed Hassan (hafidh mwenye ulemavu wa macho) kutoka kwa da’iya Mustafa Hassani, yameelezewa na watumiaji kama “mwito kutoka mbinguni” na “kurudi kwa roho ya kiroho katika televisheni.”
Tuzo na Heshima
Thamani ya jumla ya zawadi katika Dawlat al-Tilawa ni pauni milioni 3.5 za Kimasri. Washindi wawili wa kwanza katika mashindano ya kisomo na Tajweed watapokea pauni milioni 1 kila mmoja, pamoja na heshima ya kurekodi Qur’ani nzima kwa sauti zao kwa ajili ya kurushwa katika kituo cha Misr Qur’an Kareem. Pia watapewa nafasi ya kuongoza swala za Taraweeh katika Msikiti wa Imam Hussein (AS) wakati wa Ramadhani ijayo.
Sauti ya Al-Azhar
Kitengo cha Al-Azhar cha kupambana na misimamo mikali kimesifu kipindi hiki, kikisema kuwa kinaonyesha nafasi ya kihistoria ya Misri katika kulea sauti za Qur’ani. Kimeeleza kuwa Dawlat al-Tilawa ni mfano wa kisasa wa kukabiliana na misimamo mikali kwa kuelewa maana za Qur’ani na kusafisha nafsi kupitia kisomo cha unyenyekevu.
“Kipindi hiki kinarejesha binadamu katika kiini cha ujumbe wa Uislamu – rehema na amani – na kinamlinda dhidi ya misimamo mikali na chuki,” kilisema kituo hicho.
3495435
