Viongozi wa Ulaya waaswa kukomesha kuchochea chuki dhidi ya Uislamu
Katika tukio la kusikitisha, huduma za dharura ziliitwa katika Msikiti wa Masjid Al Aqsa huko Lancashire, Uingereza, baada ya moto kuzuka alfajiri ya Jumamosi. Polisi wa Lancashire walithibitisha kuwa dirisha lilivunjwa na moto kuwashwa kwa makusudi ndani ya msikiti huo.
Wakati huohuo, watu wasiojulikana walivunja madirisha ya Msikiti wa El Hidaya huko Roussillon, kusini mashariki mwa Ufaransa, wakaharibu samani na kubandika vipeperushi vya chuki ukutani.
Katika taarifa iliyotolewa baada ya mashambulizi hayo, Baraza la Mahusiano ya Kiislamu la Marekani (CAIR), shirika kubwa zaidi la kutetea haki za Waislamu nchini humo, lilirudia wito wake kwa viongozi wa Ulaya kuacha kuchochea chuki dhidi ya Waislamu.
Edward Ahmed Mitchell, Naibu Mkurugenzi Mtendaji wa CAIR, alisema Jumapili: "Tunalaani mashambulizi haya ya kinyama dhidi ya jamii za Kiislamu za Uingereza na Ufaransa, na tunasimama pamoja na Waislamu wa Ulaya. Viongozi waliochaguliwa kote Ulaya lazima waache kuchochea moto wa chuki dhidi ya Uislamu kupitia matamshi yao ya hadharani na sera za kibaguzi. Vinginevyo, mashambulizi haya yanaweza kuongezeka."
Mitchell pia alikumbusha kuwa mapema mwezi huu, CAIR ilitoa tena wito kwa maafisa wa Ufaransa kuacha kuchochea Uislamu-chuki, baada ya mshukiwa mmoja kuripotiwa kumuua jirani yake wa Kitunisia na kumjeruhi vibaya Mwislamu wa Kituruki kusini mashariki mwa Ufaransa.
3493669
