Wanawake Waislamu wa Belarus wazindua daftari maridadi la Aya za Qur'an za Mafunzo ya Kila Siku

IQNA – Kundi la wanawake Waislamu wanaojihusisha na harakati za kidini nchini Belarus limezindua mradi wa kipekee wa kueneza ujumbe wa Qur'an uitwao “Katika Njia ya Tabia Njema.”

Mradi huu unalenga kuwasilisha aya mpya kutoka Qur'an kila wiki kwa ajili ya tafakuri na jitihada za kuitekeleza katika maisha ya kila siku. Hivi karibuni, mradi huu umehitimishwa kwa uzinduzi wa daftari maridadi la aya, likiwa na jina hilo hilo.

Kuhusu juhudi hizi za da‘wah, Elena Ivashchenko, mlinganiaji na mwanaharakati wa elimu miongoni mwa wanawake Waislamu wa Belarus, aliandika kupitia ukurasa wake wa Facebook: “Wazo hili lilizinduliwa miezi kadhaa iliyopita kwa lengo la kumkutanisha Muislamu na Kitabu cha Mwenyezi Mungu kupitia ukumbusho wa mara kwa mara.”

Aliongeza kuwa mradi huu “umekuja kuifanya Qur'an kuwa sehemu ya maisha ya kila siku ya Muislamu,” na akathibitisha kuwa lengo la daftari hilo ni “kuwa ukumbusho rahisi unaoweza kubadilisha siku yako yote... Fungua, tabasamu, na uchote joto na msukumo kutoka humo.”

Kuhusu faida za chapisho hili, alieleza kuwa muundo wake ni wa kiutendaji, kwa kuwa na pete za chuma zinazowezesha kuongeza au kupanga upya kurasa kwa urahisi, pamoja na uwezo wa kulihuisha daftari hilo kwa aya mpya kila wiki kama sehemu ya mradi.

Daftari hilo pia lina maandiko ya Qur'an kwa Kiarabu sambamba na tafsiri ya Kirusi ili kuongeza nafasi ya tafakuri na mazingatio. Aidha, lina mandhari ya maua maridadi yenye mng’ao hafifu na jalada imara, likifaa kwa matumizi binafsi au zawadi kwa makundi mbalimbali ya umri.

Waanzilishi wa mradi wamethibitisha kuwa daftari hilo linaweza kutumika kama jarida binafsi kwa kuandika ukumbusho wa Qur'an au kama zawadi yenye maana ya msukumo na faraja.

3494604