Mwanasiasa wa Iraq: Sira ya Mtume(SAW) Ni Ramani ya Umoja

IQNA – Sheikh Maan bin Ali al-Jarba, Mwenyekiti wa Umoja wa Makabila ya Waarabu wa Iraq, amesema kuwa Sira ya Mtume Muhammad (SAW) inatoa mafunzo muhimu kuhusu umoja na uongozi unaoheshimu haki za raia wote.

Alitoa kauli hiyo katika mahojiano na Shirika la Habari za Qur'ani la Kimataifa (IQNA pembezoni mwa Mkutano wa 39 wa Kimataifa wa Umoja wa Kiislamu uliofanyika Tehran.

“Tumejumuika hapa kuikumbusha dunia kuhusu Sira ya Mtume (SAW), hasa mfano wake wa kuunganisha wanadamu na kuasisi serikali iliyotetea haki za raia wote,” alisema Sheikh al-Jarba.

Alikumbusha kuwa Mtume Muhammad (SAW) alipohamia Madina, aliweka katiba ya maandishi inayotambuliwa kuwa miongoni mwa za mwanzo kabisa katika historia. Hati hiyo, inayojulikana kama Mkataba wa Madina, ilihakikisha haki za raia wote bila kujali dini, kabila, au jinsia.

“Hata Wayahudi na washirikina walitambuliwa na kupewa haki kama wanajamii sawa,” alisisitiza, akieleza kuwa Waislamu wa leo wanapaswa kuiga mfano huo ili kukabiliana na hatari za pamoja.

Al-Jarba alielekeza pia kwenye changamoto za kisiasa za sasa. “Utawala wa Israel umetangaza wazi mpango wake wa ‘Israel Kubwa’. Kwa mara ya kwanza, waziri mkuu wake ametamka hilo hadharani mbele ya mataifa ya Kiarabu na Kiislamu. Hili linatufanya tuhitaji umoja na mshikamano zaidi kuliko wakati wowote,” alisema.

Alipoulizwa kuhusu sifa za kimaadili za Mtume (SAW) na mchango wake katika kuimarisha umoja wa Kiislamu, alijibu: “Mtume (SAW) alichaguliwa na Mwenyezi Mungu kama mwanadamu kamili mwenye sifa za kiungu za kimaadili. Alikuwa Qur’ani inayotembea. Tunapaswa kuzitekeleza maadili haya ili kufanikisha umoja wa Kiislamu.”

Kuhusu kuifanya Sira kuwa halisi katika maisha ya kisasa, alisisitiza haja ya kuvuka mipaka ya masomo ya kitaaluma. “Tunapaswa kuigeuza Sira kuwa maisha halisi katika shule zetu, vyuo vikuu, misikiti, na mahusiano ya kila siku—hata na wasiokuwa Waislamu. Hili litasaidia kuleta heshima ya kimataifa kwa Uislamu,” alieleza.

Sheikh al-Jarba pia alisisitiza huruma ya Mtume Muhammad (SAW) kwa watu wote. “Alikuwa mwenye huruma zaidi miongoni mwa wanadamu, si kwa Waislamu tu bali kwa kila mtu. Hadithi maarufu ya subira yake kwa jirani Myahudi aliyemtendea vibaya inaonyesha rehema hiyo. Tunapaswa kufufua maadili kama haya ili kuokoa dunia dhidi ya kuporomoka,” alisema, akiongeza kuwa migogoro ya leo inatokana na viongozi wa Ulaya na Marekani “wanaokosa imani kwa ubinadamu na hata kwa kanuni za sheria za kimataifa.”

3494628/