Uongozi wa Mtume Muhammad (SAW) Ulijaa Rehema na Umoja

IQNA – Msomo mmoja wa Kiislamu kutoka Iran amesisitiza kuwa mfano wa Mtume Muhammad (SAW) katika uvumilivu, msamaha na uongozi wa kuunganisha jamii ni wa kipekee na haujawahi kulinganishwa hadi leo.

Hujjatul-Islam Sayyid Mahmoud Tabatabaei Nejad, mtafiti katika Taasisi ya Dar al-Hadith, alieleza kuwa Mtume Muhammad  (SAW) aliwahi kuwapa majukumu hata wale waliokuwa maadui zake wa zamani. Kwa kufanya hivyo, aliweka kiwango cha juu cha uvumilivu na hekima ya kipekee.

“Mtindo wake wa uongozi ulikuwa kuwashirikisha watu katika kusimamia mambo yao, hata waliompinga hapo awali. Hii ni moja ya sifa za kipekee za tabia yake,” alisema katika mahojiano na IQNA.

Hujjatul-Islam Tabatabaei Nejad alifafanua kuwa ujumbe wa Mtume Muhammad  (SAW), kwa mujibu wa Qur’ani, ulijikita katika “utakaso na mafundisho,” huku akibeba mateso na changamoto nyingi katika kuwaongoza watu. Aliongeza kuwa moja ya mafundisho makuu ya Mtume Muhammad  (SAW)  ni “kuwa na huruma na rehema kwa wengine.”

Akinukuu Qur’ani, alisema kuwa umoja ni neema kubwa ya Mwenyezi Mungu, ilhali mgawanyiko ni silaha ya Shetani. “Jamii yenye mifarakano inafanana na moto wa Jahannam, lakini umoja huifanya familia na jamii kufanana na pepo,” alisisitiza.

Alibainisha kuwa lengo la kuamrisha mema na kukataza maovu ni kudumisha mshikamano, si kuleta migawanyiko.

Kuhusu tabia ya msamaha ya Mtume, mtaalamu huyo alikumbusha tukio la ushindi wa Makka. “Wengine waliliona kama siku ya kisasi, lakini Mtume alitangaza kuwa ni siku ya rehema, na akawasamehe hata wapinzani wake wakubwa,” alisema.

Aidha, alieleza jinsi Mtume Muhammad  (SAW) alivyowasamehe watu wa nyumba ya Abu Sufyan na hata kumteua kijana wa ukoo wa Umayyah — aliyewahi kuidhalilisha dini ya Uislamu — kuwa gavana wa Makka.

Akisisitiza mafundisho ya Qur’ani, Tabatabaei Nejad alisema kuwa kujibu uhasama kwa wema mara nyingi humgeuza adui kuwa rafiki. “Muujiza wa Mtume haukuwa Qur’ani pekee, bali pia uwezo wake wa kuunganisha makabila yaliyokuwa yamegawanyika kuwa jamii moja,” alisema, akinukuu maneno ya mwanahistoria Ibn Khaldun.

Kwa hitimisho, alisisitiza kuwa urithi wa Mtume Muhammad (SAW) wa huruma, mshikamano na uongozi wa kuleta umoja unabaki kuwa mfano wa kudumu kwa wanadamu wote.

4304495