Msomi wa Kiislamu: Mafundisho ya Mtume Muhammad (SAW) ni njia ya Umoja wa Kiislamu
Akizungumza na IQNA pembezoni mwa Mkutano wa 39 wa Umoja wa Kiislamu Duniani, Sheikh Daqaq alinukuu aya ya Qur’ani isemayo: “Na hatukukutuma ila uwe rehema kwa walimwengu” (Al-Anbiya 21:107), na kusema: “Kwa mujibu wa aya hii, Mtume Muhammad (SAW) ni rehema kwa wanadamu wote.”
Alibainisha kuwa mwaka huu unatimiza miaka 1,500 tangu kuzaliwa kwa Mtume Muhammad (SAW), akisema: “Hii ina maana kwamba kwa miaka 1,500, rehema ya Mwenyezi Mungu imekuwa ikituzunguka kupitia kuzaliwa kwa Mtume (SAW).”
Sheikh huyo alisisitiza kuwa kuelewa maisha ya Mtume kunahitaji kuishi kwa mujibu wa mafundisho yake ya kimungu na ya kiutendaji katika maisha ya kila siku. Akirejea aya nyingine: “Wakali kwa makafiri, wenye huruma wao kwa wao” (Al-Fath 48:29), Sheikh Daqaq aliongeza: “Kama vile Mtume Muhammad (SAW) na maswahaba wake walivyoishi kwa mujibu wa aya hii, nasi pia tunapaswa kuimarisha mizizi ya umoja, mshikamano na udugu ndani ya umma wa Kiislamu, na kusimama imara dhidi ya maadui, wakiwemo Marekani na utawala wa Kizayuni.”
Aliendelea kusema: “Ikiwa tunataka kuwa Waislamu wa kweli na wafuasi wa dhati wa Mtume Muhammad (SAW), ni lazima tuonyeshe huruma na mshikamano baina yetu, huku tukipinga makafiri, madhalimu na watawala wa kiimla.”
Akihitimisha hotuba yake, Sheikh Daqaq alisema kuwa kufuata mfano wa Mtume (SAW) kutawawezesha Waislamu kuishi kwa mujibu wa mafundisho ya Qur’ani: “Nyinyi ni umma bora uliotolewa kwa ajili ya watu. Mnaamrisha mema na mnakataza maovu” (Al-Imran 3:110). Alisema: “Kwa kutekeleza mafundisho ya Mtume, tunaweza kuwa jamii bora miongoni mwa watu, tukilingania mema na kukemea maovu.”
3494652
