Mashindano ya Qur'ani ya ‘Zayin al-Aswat’ yatia motisha kizazi kipya cha Wasomaji na Wahifadhi

IQNA – Afisa wa kamati ya maandalizi ya mashindano ya kwanza ya Qur'ani ya Zayin al-Aswat amesema kuwa lengo kuu la tukio hilo la Qur'an ni kutambua, kulea, na kuandaa vipaji mahiri vya vijana kutoka maeneo mbalimbali ya nchi.

Mansour Aghamohammadi aliambia  Shirika la Habari za Qur'ani la Kimataifa (IQNA kuwa mashindano haya ni mwanzo wa kuchanua kwa vipaji safi vya Qur'ani, na yatafungua njia ya kuandaa wasomaji na wahifadhi bora wa Qur'ani Tukufu.

Toleo la kwanza la mashindano ya Zayin al-Aswat lilifanyika katika mji mtukufu wa Qom mnamo Jumatano na Alhamisi (Oktoba 1–2, 2025).

Zaidi ya waombaji 1,600 kutoka mikoa yote 31 walijiandikisha, huku 94 wakifika hatua ya mwisho. Washiriki wenye umri kati ya miaka 14 hadi 24 walishindana katika aina mbalimbali za usomaji wa Qur'ani chini ya usimamizi wa majaji wa kimataifa.

Mashindano hayo, yaliyoandaliwa chini ya kauli mbiu “Qur'ani, Kitabu cha Waumini,” yaliandaliwa na Kituo cha Masuala ya Qur'ani cha Taasisi ya Al al-Bayt kwa usaidizi wa taasisi za kitamaduni na za Qur'ani. Kisomo chote kilirekodiwa na kitachapishwa kupitia majukwaa ya vyombo vya habari vya taasisi hiyo.

Aghamohammadi, ambaye alisimamia utekelezaji wa kiufundi wa tukio hilo na kuwasaidia washiriki, alisisitiza nafasi maalum ya mashindano haya katika uwanja wa shughuli za Qur'ani nchini humo.

Alisema kuwa kuandaliwa kwa mashindano ya Zayin al-Aswat kunapaswa kuchukuliwa kama hatua ya mabadiliko katika kugundua na kulea vipaji safi vya Qur'an.

“Haya si mashindano ya kawaida tu, bali ni warsha ya kielimu na kipimo cha uwezo wa wasomaji na wahifadhi vijana, ambacho kinaweza kufungua njia ya ukuaji na ubora wao,” aliongeza.

Akifafanua sifa za kipekee za mashindano hayo, alisema: “Mojawapo ya sifa mashuhuri ni uwepo thabiti na wenye athari wa wasomi na wataalamu wa Qur'ani wa kitaifa, ambao wanachangia kwa kiwango kikubwa katika kuinua ubora wa mashindano kwa kushiriki maarifa yao ya thamani. Pia, msaada usiotetereka kutoka kwa viongozi wa kidini, hasa Ayatollah Mkuu Ali al-Sistani, umeleta baraka za kiroho maalum kwa tukio hili.”

Akizungumzia mchakato wa kuchagua washiriki, alisema kuwa washiriki wa toleo hili walichaguliwa kutoka kwa washindi wa mikoa na kwa kutumia vigezo vya tathmini vilivyokazwa zaidi, jambo linaloonyesha ubora wa juu wa mashindano haya. “Zaidi ya hayo, mipango makini na ushauri kutoka kwa wataalamu wazoefu vimeunda mazingira bora kwa mashindano yenye tija na mafanikio.”

Aghamohammadi pia alieleza matarajio ya baadaye ya tukio hili, akisema: “Tunaamini kuwa mashindano ya Zayen al-Aswat yanaweza kuwa kituo kikuu cha kutambua na kulea vipaji mahiri vya Qur'ani katika siku zijazo. Malengo mengine ya muda mrefu ya tukio hili la Qur'ani ni pamoja na kuunda mtandao thabiti wa wasomaji na wahifadhi vijana wenye kujitolea, kuboresha viwango vya kitaifa vya usomaji na hifadhi ya Qur'ani Tukufu, na kuandaa kizazi cha wanafunzi wa Qur'ani wenye ujuzi wa mbinu za kisomo na maarifa ya Qur'ani.”

Aliongeza kuwa ili kutumia kikamilifu fursa hii ya thamani, programu mbalimbali za kielimu ziliandaliwa kwa washiriki katika toleo la kwanza, zikiwemo warsha maalum za kisomo na hifadhi, mikutano ya kielimu kwa ushiriki wa wataalamu mashuhuri, na kozi za kukuza ujuzi, “ambazo tunatumaini zitakuwa hatua madhubuti kuelekea kulea wanafunzi wa Qur'ani wa hali ya juu.”

4308296