Mashindano ya Kwanza ya Qur'ani na Sunnah Yazinduliwa Nchini Brazil
Mashindano haya yameandaliwa chini ya usimamizi wa Wizara ya Mambo ya Kiislamu, Da’wah na Mwongozo ya Saudi Arabia.
Akizungumza katika hafla ya ufunguzi, Abdulhamid Mutawalli, mkuu wa Kituo cha Kiislamu cha Kimataifa cha Kuvumiliana na Amani kwa Brazil na Amerika ya Kusini, alisisitiza umuhimu wa Qur'ani kwa familia za Kiislamu nchini Brazil.
Alisema kuwa mojawapo ya baraka kubwa ambazo Mwenyezi Mungu Mtukufu amewapa Waislamu katika nchi kama Brazil ni kwamba nyumba zao zimejaa baraka ya usomaji na hifadhi ya Qur'ani Tukufu.
“Nchini Brazil, ambako makabila na tamaduni ni tofauti na utambulisho unayeyuka ndani ya jamii pana, tunaona familia za Kiislamu zikijitahidi sana kudumisha uhusiano wa watoto wao na Qur'ani Tukufu. Qur'ani ndiyo kiungo chenye nguvu zaidi kwa utambulisho wao, lugha yao na dini yao.”
Aliongeza:
“Kupitia kazi yangu ya da’wah na kuhudumia jamii ya Kiislamu nchini Brazil, nimeona jinsi akina mama na baba wanavyotamani Qur'ani iwe sehemu ya maisha ya kila siku ya watoto wao. Tangu wakiwa wadogo, watoto huanza kusikiliza usomaji wa Qur'ani nyumbani, hata kama hawaelewi maneno yote, ili mioyo yao izoe ladha ya Qur'ani kabla ya kujifunza herufi zake. Baadaye hukua na kuhudhuria vikao vya hifadhi misikitini na katika vituo vya Kiislamu, ambavyo, Alhamdulillah, vimeenea katika miji kadhaa na vinaongozwa na maulamaa na wasomaji mahiri.”
Alifafanua kuwa mojawapo ya mambo ya kushangaza nchini humo ni jinsi masikio ya kizazi kipya, kwa neema ya Mwenyezi Mungu, yamevutiwa na uzuri wa sauti za makari mashuhuri wa Misri waliotoa harufu nzuri ya usomaji wa Qur'ani duniani.
“Mara nyingi huwaona watoto na vijana hapa wakiziiga sauti za makari wa Misri kama Sheikh Muhammad Rifaat, Sheikh Abdul Basit Abdul Samad, na Sheikh Mustafa Ismail – Mwenyezi Mungu awarehemu wote. Ni kana kwamba wasomaji hawa wamekuwa kama shule mpya ya fikra, wakivutia vijana wa Magharibi kama walivyovutia vizazi vya Mashariki.”
Mutawalli aliendelea:
“Familia nyingine hata huhakikisha watoto wao wanasikiliza rekodi za usomaji wa zamani kabla ya kulala, ili akili zao ziwe safi kwa ajili ya Qur'ani na waelewe Tajweed na usomaji kabla ya kuanza masomo ya nadharia. Bila shaka, hili linaonekana katika namna watoto wetu wanavyosoma misikitini, ambako wanahisi utamu wa maqam, usafi wa sauti, na unyenyekevu – ingawa mazingira yao yako mbali na lugha ya Kiarabu na mitindo ya usomaji wa Qur'ani.”
Alisisitiza kuwa jitihada hizi za baraka kutoka kwa familia za Kiislamu nchini Brazil na ongezeko la miduara ya usomaji wa Qur'ani ni jambo la kutia moyo.
“Tunashuhudia watoto wakishindana kuhifadhi Qur'ani, na jinsi wanavyopenda makari wakubwa na kuiga sauti zao – jambo linaloonyesha ujumbe wazi kuwa Qur'ani Tukufu ni ngome inayolinda utambulisho wa Waislamu popote walipo. Na kwa neema ya Mwenyezi Mungu, Qur'ani itaendelea kuwa taa ya mwongozo na nuru, na licha ya changamoto, itarithiwa kizazi baada ya kizazi.”
3494977
