Nakala ya Qur’ani iIliyoandikwa kwa mkono na mkaligrafia mashuhuri yakabidhiwa ISESCO

IQNA – Shirika la Elimu, Sayansi na Utamaduni la Ulimwengu wa Kiislamu (ISESCO) limepokea nakala adimu ya Qur’ani Tukufu iliyoandikwa kwa mkono wa Abu al-Hasan Ali bin Hilal bin Abdul Aziz, mkaligrafia maarufu wa ulimwengu wa Kiislamu.

Nakala hii ya Qur’ani, iliyoandikwa na Abdul Aziz anayejulikana kwa jina la “Ibn Bawab”, imetolewa kwa ISESCO na Ratiba al-Safrioui, profesa mstaafu wa chuo kikuu nchini Morocco.

Kwa mujibu wa ISESCO, al-Safrioui alitoa nakala hii kwa shukrani kwa nafasi ya kipekee ya shirika hilo katika kuhifadhi na kuendeleza turathi za maandiko ya ulimwengu wa Kiislamu.

Mkurugenzi Mkuu wa ISESCO, Salim bin Mohammed al-Malik, alisifu hatua hiyo akisema kuwa ni kitendo cha kupongezwa kwa kuwa ni desturi njema ya kuunga mkono maandiko ya ulimwengu wa Kiislamu na kuhimiza kusambazwa kwa elimu. Aliongeza kuwa hatua hii pia inaimarisha nafasi ya ISESCO, ambalo linajitahidi kulinda vipengele vya utamaduni dhidi ya uharibifu na kuvitambulisha turathi za jamii za Kiislamu pamoja na mchango wao wa kielimu, kisayansi na kimaendeleo.

Al-Safrioui alieleza kuhusu Qur’ani hiyo katika hafla ya kukabidhi, akisema nakala hii ilipokelewa na kaka yake marehemu, Sayyid Abdul-Hayy Al-Safrioui, na inajumuisha kijitabu cha utangulizi pamoja na tafsiri ya maana ya baadhi ya Surah za Qur’ani kwa lugha ya Kifaransa.

Ibn Bawab anachukuliwa kuwa mmoja wa wakaligrafia mashuhuri wa karne ya tatu na ya nne Hijria, aliyebuni kanuni za uandishi wa hati ya Naskh na kuweka uwiano wa kimaumbo na uzuri kati ya vipengele vya kila herufi.

Aliandika nakala 64 za Qur’ani Tukufu, maarufu zaidi ikiwa ni nakala pekee iliyosalia ya maandiko yake, iliyoandikwa Baghdad mwaka 391 Hijria. Nakala hiyo inahifadhiwa katika Maktaba ya Chester Beatty mjini Dublin, mji mkuu wa Ireland, na nakala iliyotolewa kwa ISESCO imetokana na hiyo.

3495865