Mkutano wa viongozi wa dini Malaysia wajadili amani

IQNA - Mji mkuu wa Malaysia wa Kuala Lumpur uliandaa mkutano wa kimataifa wa viongozi wa kidini siku ya Jumanne.

Zaidi ya viongozi wa kidini na wanazuoni 2,000 kutoka nchi 57 walikusanyika jana mjini Kuala Lumpur kwa ajili ya kongamano hilo lililoandaliwa na Jumuiya ya Waislamu Ulimwenguni (WML) kujadili nafasi ya dini katika kuwezesha mipango ya mazungumzo na amani.

MWL, shirika la kimataifa la Kiislamu lisilo la kiserikali lililoanzishwa mwaka wa 1962, liliandaa Mkutano wa Kimataifa wa Viongozi wa Kidini wa 2024 kwa kushirikiana na Idara ya Maendeleo ya Kiislamu ya Malaysia.

Mkutano huo ulizinduliwa na Waziri Mkuu wa Malaysia Anwar Ibrahim na Katibu Mkuu wa MWL Sheikh Dkt Mohammad bin Abdulkarim Al-Issa.

"Mkutano huu wa kidini utakuwa kipengele cha kila mwaka nchini Malaysia kwa kuwa umefaulu katika kujenga maelewano na mshikamano kati ya dini duniani, na vile vile nchini Malaysia," Anwar alisema wakati wa hotuba yake.

“Katika kongamano kama hili, tunaweza kuona mambo yanayotakiwa kufanywa na yanahitaji kuboreshwa miongoni mwa Waislamu, Wakristo, Wabudha au Wahindu. Tunataka kusikiliza ushauri wako, ukosoaji na mapendekezo yako."

Ingawa karibu theluthi mbili ya wakazi zaidi ya milioni 33 wa Malaysia ni Waislamu, pia kuna Wabudha, Wahindu, na Wakristo walio wachache nchini humo.

Al-Issa naye alisema mkutano huo unalenga kuwa na athari inayoonekana.

“Mkutano huu wa kimataifa ulihudhuriwa na viongozi wa kimataifa, kidini, kisiasa, kiakili, kitaaluma na vyombo vya habari. Ni hatua ya kwanza ya mafanikio makubwa kupitia mipango na programu kadhaa kote ulimwenguni, zinazolenga kuimarisha urafiki na ushirikiano kati ya mataifa na watu, "alisema.

3488248