Mwanazuoni wa Al-Azhar: Mtume (SAW) Ni Kielelezo Cha Milele

IQNA – Mwanazuoni mashuhuri wa Al-Azhar, Dkt. Salama Abd Al-Qawi, ameadhimisha siku ya kuzaliwa kwa Mtume Muhammad (SAW) kwa kutoa wito wa kutafakari urithi wake na changamoto zinazoukabili ulimwengu wa Kiislamu leo.

Akizungumza katika kongamano la kimataifa lililoandaliwa na Shirika la Habari za Qur'ani la Kimataifa (IQNA) kwa anwani “Karne 15 za Kumfuata Mjumbe wa Nuru na Rehema”, Dkt. Al-Qawi aliwahimiza Waislamu kurejea mafundisho ya Qur’an na mfano wa Mtume, hasa katika kipindi alichokieleza kuwa cha majaribu kwa umma wa Kiislamu. Alisema maadhimisho haya yanakuja wakati ambapo Waislamu wanakabiliwa na “majeraha na maumivu” bila msaada wa kutosha wala faraja.

Akihoji kwa msisitizo, alitamka: “Iwapo leo Mtume wa Uislamu angekuwa miongoni mwetu, tungeweza kusema nini? Tungeweza kumwambia nini akituuliza tumefanya nini kuutetea Uislamu na kuwahudumia wanyonge?”

Dkt. Al-Qawi alimwelezea Mtume Muhammad (SAW) kuwa ni kielelezo kamili kwa kila zama na kila mahali. “Mwenyezi Mungu aliweka ndani ya Mtume kila kitu ambacho umma unahitaji—alikuwa mja mcha Mungu, mwanasiasa mwenye busara, kiongozi wa kipekee katika utawala, na kamanda katika jihadi,” alisema, akinukuu aya ya Qur’an: “Hakika katika Mtume wa Mwenyezi Mungu kuna kielelezo chema (ruwaza njema)…” (Qur’an 33:21).

Alikosoa tabia ya kupunguza urithi wa Mtume hadi mambo ya nje tu kama mavazi na desturi. “Wengi humwasilisha Mtume kama mtu wa kujitenga na dunia, na humfunga katika sura ya kimila na mavazi. Wanapuuza nafasi yake katika kusimamisha utawala, haki, na mshikamano,” alieleza.

Aidha, alilalamikia mgawanyiko ndani ya jamii ya Kiislamu na nafasi ya baadhi ya watawala na maulamaa ambao aliwatuhumu kwa usaliti na kutumia dini vibaya. Alionya dhidi ya kuifanya risala ya Mtume kuwa ya sherehe tu, akisisitiza umuhimu wa kuitekeleza katika utawala, haki ya kijamii, na mshikamano wa pamoja.

Akinukuu aya za Qur’an zinazohimiza umoja, aliwahimiza Waislamu “kushikamana na kamba ya Mwenyezi Mungu” na kukataa mifarakano. Aliongeza kuwa mfano wa Mtume unapaswa kuwahamasisha waumini kuimarisha jamii zao na kupinga dhulma.

Alihitimisha kwa dua, akiomba Waislamu waishi kwa mwongozo wa Mtume (SAW) katika nyanja zote za maisha. “Tunajivunia kuutetea ujumbe wake, lakini hili haliwezi kufikiwa isipokuwa tukifuata matendo na maneno yake kwa undani, na kuyatekeleza kwa vitendo,” alisema.

3494555