Msikiti Wafunguliwa Gaza Baada ya Kusitishwa kwa Mapigano, Sauti ya Adhana Yarejea Kambini

IQNA – Baada ya miezi kadhaa ya kufungwa kutokana na mashambulizi ya angani, Msikiti wa Al-Tawhid ulioko katika kambi ya wakimbizi ya Al-Shati, Gaza, umefunguliwa tena na sauti ya adhana imeanza kusikika kwa mara nyingine.

Msikiti huo, uliopo upande wa magharibi wa Jiji la Gaza, ulifungwa kufuatia mashambulizi makali ya Israel katika eneo la kaskazini mwa Ukanda wa Gaza. Kufunguliwa kwake kumekuja baada ya makubaliano ya kusitisha mapigano kati ya makundi ya mapambano ya Wapalestina na utawala wa Israel.

Ni msikiti pekee katika eneo hilo la magharibi ambao haukuharibiwa kabisa, na sasa umeanza tena kutekeleza nafasi yake kama kitovu cha kiroho.

Video iliyorekodiwa na Al Jazeera ilionyesha muumini akiingia msikitini na kusujudu kwa shukrani. Alisema kuwa amekuwa akihamishwa mara nyingi, na kwamba “msikiti huu ni kama nyumbani kwangu.”

Muumini mwingine alielezea kufunguliwa kwa msikiti huo kama “kurejea kwa roho ndani ya mwili,” jambo lililotokea baada ya miaka miwili migumu.

Muezzin wa msikiti alibainisha kuwa licha ya msikiti kuokoka, jengo lake lilipata uharibifu mkubwa kutokana na mashambulizi. Aliongeza, “Kwa msaada wa watu wa kambi na kusitishwa kwa mapigano, tuliweza kusafisha msikiti ili waumini waweze kutekeleza ibada za Mwenyezi Mungu.”

Kusitishwa kwa mapigano kulianza saa sita mchana siku ya Ijumaa. Vikosi vya Israel vilijiondoa hadi kwenye mistari yao kulingana na ramani ya makubaliano, na maelfu ya familia zilizokuwa zimehamishwa zilianza kurejea kaskazini mwa Gaza kupitia njia za Al-Rashid na Salah al-Din.

Tangu Oktoba 2023, Gaza imekumbwa na uharibifu mkubwa wa maeneo ya ibada. Ripoti kutoka Wizara ya Awqaf ya Gaza zinaonyesha kuwa zaidi ya misikiti 960 imeharibiwa au kubomolewa wakati wa vita vya Israel dhidi ya Gaza.

Mashirika ya kibinadamu na ya kitamaduni yameonya kuwa mashambulizi ya makusudi dhidi ya maeneo ya ibada ni ukiukaji wa sheria za kimataifa. Tume ya Umoja wa Mataifa ilielezea mashambulizi dhidi ya misikiti na shule zinazowahifadhi raia kama “maangamizi” ya maeneo ya kidini.

Zaidi ya Wapalestina 67,000 wameuawa katika kipindi cha miaka miwili ya mashambulizi ya ya mauaji ya kimbari ya Israel dhidi ya Gaza, yaliyoanza tarehe 7 Oktoba 2023.

3495014