Israel yaendeleza jinai Gaza, yaua watoto zaidi ya 300 wiki mbili

IQNA – Shirika la Umoja wa Mataifa la Kuhudumia Watoto (UNICEF) limeripoti kuwa zaidi ya watoto 300 wameuawa Gaza tangu vikosi vya utawala wa Kizayuni wa Israel vilipoanza upya vita mnamo Machi 18.  

Katika taarifa iliyotolewa Jumanne, UNICEF imesema kuwa watoto wasiopungua 322 wamepoteza maisha, na wengine 609 wamejeruhiwa katika mashambulizi mapya ya Israel. 

Shirika hilo lilieleza kuwa idadi ya wahanga inalingana na wastani wa karibu watoto 100 waliouawa au kujeruhiwa kila siku kwa siku 10 zilizopita. 

"Watoto wengi miongoni mwa waliouawa walikuwa wakimbizi, wakiwa wamepata hifadhi katika mahema ya muda au nyumba zilizoharibika," taarifa hiyo ilibainisha. Pia ilirejelea ripoti kwamba baadhi ya wahanga walikuwa miongoni mwa waliojeruhiwa au kuuliwa wakati shambulio la Israel lililenga idara ya upasuaji ya Hospitali ya Al Nasser kusini mwa Gaza mnamo Machi 23. 

Mkurugenzi Mtendaji wa UNICEF, Catherine Russell, amesisitiza athari mbaya za kuongezeka kwa ghasia, akibainisha kuwa kusitishwa kwa vita kwa miezi miwili kulitoa watoto wa Gaza fursa fupi ya kupumzika na matumaini ya kupona. 

"Watoto wameingizwa tena katika mzunguko wa ghasia na ukosefu wa huduma," alisema, akiwataka vikosi vya Israel kutimiza wajibu wao chini ya sheria za kibinadamu za kimataifa kulinda raia, hasa watoto.

Wakati huohuo, Wizara ya Afya ya Gaza iliripoti Jumanne kwamba hospitali kote katika eneo hilo zimepokea miili 42 na watu 183 waliojeruhiwa katika saa 24 zilizopita.

Kulingana na takwimu za wizara, watu wasiopungua 1,042 wameuawa tangu Machi 18, na kuleta idadi ya vifo kwa jumla tangu Oktoba 7, 2023, hadi 50,399. UNICEF inakadiria kuwa takriban watoto 15,000 miongoni mwa waliouawa walikuwa watoto.

3492548