Polisi Uingereza wachunguza tukio la chuki baada ya moto katika Msikiti wa East Sussex
Huduma za dharura ziliwasili eneo la tukio saa 3:50 usiku baada ya ripoti za moto nje ya Msikiti wa Peacehaven, kwa mujibu wa Polisi wa Sussex. Kikosi cha zimamoto kilidhibiti moto haraka na kuthibitisha kuwa hakuna mtu aliyejeruhiwa.
Video iliyotazamwa na Sussex News inaonyesha mtu aliyevaa barakoa akiwasha moto kwa kutumia vifaa vilivyowekwa kwenye mlango wa msikiti. Moto huo uliharibu mlango wa mbele wa jengo na gari lililokuwa karibu, lakini wazima moto walizuia moto usienee kwenye majengo mengine.
Polisi wamethibitisha kuwa wanachukulia tukio hilo kama uhalifu wa chuki.
Msemaji wa polisi alieleza kuwa uchunguzi unaendelea kwa kasi na maafisa wa usalama wanafanya doria za ziada ili kuwahakikishia wakazi wa eneo hilo na jamii za kidini usalama.
Katika taarifa yao, polisi waliwahimiza watu wenye taarifa kujitokeza, hususan wale wenye video kutoka CCTV, kamera za Ring, dashcam au simu za mkononi zilizorekodi tukio hilo.
Polisi pia walikiri kuwepo kwa hofu ndani ya jamii ya Kiislamu na wakatangaza kuwa kutakuwa na ongezeko la ulinzi karibu na maeneo ya ibada katika kaunti nzima.
Msikiti wa Peacehaven ulitoa taarifa kupitia Instagram ukieleza kuwa watu wawili walichoma gari lililokuwa mbele ya jengo hilo. Msikiti huo umetangaza kuwa utabaki umefungwa hadi taarifa nyingine itakapotolewa.
Polisi wanawaomba watu wenye taarifa wawasiliane na Polisi wa Sussex wakitaja Operesheni Spey, au wafanye hivyo kwa njia ya siri kupitia Crimestoppers kwa namba 0800 555 111.
3494871
