Watu Zaidi ya Milioni 53 Watembelea Misikiti Miwili Mitakatifu Mwezi Mmoja

IQNA-Katika mwezi wa Rabi al-Awwal 1447 Hijria, Misikiti Miwili Mitakatifu—Msikiti Mkuu wa Makka na Msikiti wa Mtume (SAW) huko Madina, imepokea jumla ya waumini 53,572,983, wakiwemo waumini na mahujaji, kwa mujibu wa taarifa ya Mamlaka ya Huduma za Misikiti Miwili Mitakatifu.

Kwa mujibu wa taarifa iliyotolewa Ijumaa, Msikiti Mkuu wa Makka ulipokea waumini 17,560,004, wakiwemo 91,753 waliotekeleza ibada ndani ya eneo la Hijr Ismail (Al-Hatim). Idadi ya waliotekeleza Umrah ilifikia 12,146,516.

Katika Msikiti wa Mtume (SAW) mjini Madina, waumini 20,701,560 walihudhuria ibada, huku 1,002,049 wakiswali katika eneo la Al-Rawdah Al-Sharifah. Aidha, 2,071,101 walifika kutoa salamu kwa Mtume Muhammad (SAW).

Mamlaka hiyo imeeleza kuwa inatumia teknolojia ya kisasa ya sensa kufuatilia idadi ya waumini wanaoingia kupitia milango mikuu ya misikiti hiyo miwili. Mfumo huo wa kidijitali unasaidia kuongeza ufanisi wa kiutendaji, kuratibu mikusanyiko ya watu, na kusaidia taasisi zinazohusika na huduma kwa mahujaji.

Taarifa hii inakuja sambamba na kuanza kwa hatua ya mwisho ya Mashindano ya Qur’ani ya Morocco yanayofanyika mjini Fez, yakihusisha washiriki kutoka matawi 48 ya Afrika.

3494757