Siku ya Krismasi, Msikiti wa Bradford Wakuwa Kitovu cha Jamii

IQNA – Wakati wengi walikusanyika na familia zao, milango ya msikiti mmoja mjini Bradford, kaskazini mwa Uingereza, ilifunguliwa kuwapokea wale ambao vinginevyo wangebaki peke yao.

Msikiti huo uliandaa chakula cha mchana cha bure kwa wazee, kwa lengo la kupunguza upweke katika msimu wa sherehe. Hafla hiyo iliandaliwa na Dynamic Social Care, taasisi ya huduma za wazee yenye makao Bradford, katika Shearbridge Community Hall ambayo ni sehemu ya Msikiti wa Shearbridge Road, kwa mujibu wa gazeti The Telegraph and Argus.

Mpango huo uliwaleta pamoja wazee wa eneo hilo kwa mlo wa sahani tatu, burudani na usafiri wa bure. “Kampeni yetu ya kupambana na upweke mwaka huu imekuwa mafanikio makubwa kuliko tulivyotarajia,” alisema Bi Mehnaz Bibi, Meneja wa Mradi wa Dynamic Social Care. “Hafla yetu ilikuwa ya kipekee kwa sababu iliandaliwa ndani ya ukumbi wa jamii wa Shearbridge, sehemu ya msikiti wa Shearbridge Road.”

Takribani watu 80 walihudhuria, akiwemo Mbunge wa Uingereza Naz Shah na kiongozi wa jamii Graham Swain. Waandaaji walisema lengo halikuwa tu kutoa chakula, bali pia kurejesha heshima, kuunganisha watu na kuimarisha hisia za kuwa sehemu ya jamii.

Bi Bibi alisisitiza umuhimu wa mshikamano katika kipindi cha sikukuu, akieleza kuwa mchango wa kizazi cha wazee mara nyingi umesahaulika na jamii, hali inayowafanya wajihisi wamesahaulika.

Mpango huu ulionyesha wasiwasi mpana nchini Uingereza kuhusu upweke miongoni mwa wazee, hasa katika nyakati za sikukuu ambapo hali ya kutengwa huongezeka. Kwa kufungua milango ya msikiti kwa hafla hiyo, waandaaji walitarajia kuunda mazingira jumuishi na yenye kukaribisha kila mtu.

“Hafla yetu imewaacha watu wakihisi kuthaminiwa, kusikilizwa na kuonekana – ndicho tunachotaka kufanikisha kama taasisi,” aliongeza Bi Bibi.

Mbali na chakula na shughuli, kulifanyika bahati nasibu iliyokusanya pauni 370, ambazo zitatolewa kwa benki ya chakula katika eneo la Holme Wood, Bradford, ili kuendeleza athari ya mpango huu zaidi ya siku ya Krismasi.

Waandaaji walisema tukio hilo limeonyesha namna maeneo ya kidini yanavyoweza kuhudumia jamii pana, hasa katika nyakati ambazo huruma na mshikamano wa kibinadamu unahitajika zaidi.

3495913