Saumu huboresha afya ya akili kwa kupunguza msongo na kuimarisha utulivu

IQNA – Kufunga Saumu ya Mwezi wa Ramadhani sio tu kunapelekea mwandamu kumcha Mwenyezi Mungu na kujizuia, lakini pia kama ibada ya kiroho, kuna athari nzuri za kiakili na kihisia.

Moja ya faida hizi ni kupunguza msongo wa mawazi na kuongeza utulivu. Mtu anapojiepusha na kula na kunywa kwa muda fulani, akili na mwili wake hupata fursa ya kupumzika na kujivusha.

Mchakato huu unaweza kusaidia kupunguza msongo wa kila siku na kuongeza utulivu wa ndani. Kwa mtazamo wa Qur’ani Tukufu, moja ya njia za kupata utulivu ni kupitia ibada. Mwenyezi Mungu anasema katika Aya ya 28 ya Surah Ar-Rad: "Hakika, kumkumbuka Mungu kunaleta utulivu katika nyoyo."

Aya hii inaonyesha wazi kuwa kumkumbuka Mwenyezi Mungu kunaweza kusaidia kuleta amani moyoni na kupunguza msongo. Kumwabudu Mwenyezi Mungu, kama ibada ya kiroho, kuna athari nzuri kwa roho na akili ya mwanadamu, kumwezesha mtu kujiepusha na misongo na wasiwasi wa maisha ya kila siku.

Kwa kuwa kufunga pia ni aina ya ibada, inahitimishwa kuwa kufunga kunaleta amani pamoja nayo. Kufunga kunatoa fursa ya kujisafisha na kufanya mazoezi ya subira na uvumilivu. Mchakato huu husaidia watu kupata utulivu wa ndani na kujiepusha na misongo ya kila siku.

Kulingana na Aya ya 183 ya Surah Al-Baqarah, " Enyi mlioamini! Mmeandikiwa Saumu, kama waliyoandikiwa waliokuwa kabla yenu ili mpate kuchamngu."

Aya hii inaonyesha kuwa kufunga kunapelekea uchaji Mungu na kujizuia, ambayo nayo inaweza kusaidia kupunguza msongo na kuongeza utulivu.

Kisayansi, kuna matokeo mengi yanayothibitisha athari nzuri za kufunga kwa afya ya akili. Utafiti umeonyesha kuwa kufunga kunaweza kusaidia kupunguza viwango vya homoni za msongo kama cortisol na kuboresha hali ya hisia. Aidha, kufunga kunaweza kupelekea ongezeko la viwango vya endorphins mwilini, ambayo huongeza hisia za furaha na utulivu. Matokeo haya yanapendekeza kuwa kufunga kuna athari nzuri kwa afya ya akili, sio tu kiroho bali pia kimwili.

Kwa ujumla, kufunga kumetambulishwa katika Qur’ani Tukufu kama kitendo muhimu na chenye thamani cha ibada ambacho kinaweza kuwa na athari nzuri kwa afya ya akili ya mtu. Kwa kujishughulisha na kufunga na kujikita katika kumkumbuka Mwenyezi Mungu, watu wanaweza kupata hisia za amani ya kiroho inayopunguza msongo wa kila siku na kuboresha ubora wa maisha.

Ibada hii takatifu inawapa watu fursa, wakati wa mwezi maalum, kusafisha roho zao, kuboresha mahusiano ya kijamii, na kuimarisha imani yao, ikiwaongoza kuelekea maisha bora na yenye utulivu zaidi.

3492147