Idadi ya misikiti nchini Tunisia imepindukia 5,000

IQNA – Wizara ya Wakfu na Masuala ya Kidini ya Tunisia imetangaza kuwa idadi ya misikiti nchini humo sasa imevuka 5,000, ikithibitisha nafasi ya kipekee ya nchi hiyo katika historia ya Uislamu.

Miji mingi ya Tunisia imejipatia sifa ya kuwa ngome ya turathi za kiroho, ikiambatana na uwepo wa misikiti ya kale ambayo si tu mahali pa ibada, bali pia ni vielelezo vya ustadi wa usanifu majengo wa Kiislamu unaovutia wageni kutoka duniani kote.

Mbali na kazi yake ya ibada, misikiti hii imekuwa kitovu cha mijumuiko ya kijamii, elimu, na utambulisho wa Kiislamu, ikiwa ni nguzo ya maisha ya kidini na kijamii ya wananchi wa nchi hiyo ya kaskazini mwa Afrika.

Kwa mujibu wa takwimu za Wizara ya Wakfu, baadhi ya misikiti hujitokeza kwa upekee wake wa kihistoria—hasa Msikiti wa Al-Zaytuna, ulioko katika moyo wa mji wa zamani wa Tunis. Msikiti huu ulianzishwa mwaka wa 79 Hijria, na ni kati ya misikiti ya mwanzo kabisa barani Afrika na ulimwengu wa Kiislamu.

Al-Zaytuna si tu msikiti wa ibada; ni pia chimbuko la elimu ya Kiislamu. Ukubwa wake unakadiriwa kuwa mita za mraba 5,000, na umebeba moja ya vyuo vikuu vya kwanza kabisa katika historia ya Uislamu. Miongoni mwa wanazuoni wakubwa waliotoka hapo ni pamoja na Muhammad ibn Ali al-Mazari na Ibn Khaldun—mwanahistoria mashuhuri wa Kiislamu na mwanzilishi wa nadharia ya sayansi ya jamii (ilm al-‘umran).

Msikiti huo una milango tisa ya kuingilia, na nguzo zake 160 kuu zililetwa kutoka katika magofu ya mji wa kale wa Carthage—ikiashiria kuunganika kwa historia ya Kiroma, Kiarabu na Kiislamu katika ardhi ya Tunisia.

Katika Chuo Kikuu cha Al-Zaytuna, elimu haikujikita tu kwenye Qur’ani na fiqhi, bali pia katika taaluma kama vile usuli wa sheria, nahau, tiba, historia, hisabati, mantiki, jiometri, na elimu ya sayari (cosmology). Vitabu vilivyohifadhiwa katika maktaba zake vilihesabiwa miongoni mwa hazina adimu zaidi katika nchi za Kiislamu, na maandiko ya kielimu yaliyoandikwa kwa mikono yalienea karibu kila taaluma inayojulikana wakati huo.

Wanafunzi kutoka pembe zote za dunia walikuja kujifunza katika chuo hicho, wakithibitisha nafasi ya Tunisia kama ngome ya elimu ya Kiislamu na utamaduni wa maarifa wa Karne za Kati za Uislamu.

Idadi ya watu wa Tunisia mwaka 2025 inakadiriwa kuwa 12,348,573  na ni sawa na asilimia 0.15 ya jumla ya idadi ya watu duniani.

3492594