Nigeria: Idadi ya waliouawa katika hujuma msikitini yapindukia 27

IQNA – Magaidi walifyatua risasi ndani ya msikiti katika eneo la kaskazini-kati mwa Nigeria wakati wa Swala ya Alfajiri siku ya Jumanne, na kuua angalau watu 27, maafisa wa eneo hilo na wakazi wamesema.

Shambulio hilo lilitokea katika kijiji cha Unguwan Mantau, jamii ya pembezoni katika wilaya ya Malumfashi, jimbo la Katsina. Mashuhuda wameripoti kuwa washambuliaji walivamia majira ya saa 04:00 GMT, na kuanza kufyatua risasi kiholela kwa waumini waliokusanyika kwa Swala ya Alfajiri.

Kiongozi wa kijiji alithibitisha ukubwa wa mauaji hayo, huku afisa wa hospitali akisema kuwa waathirika kadhaa walilazwa wakiwa na majeraha ya risasi.

Hakuna kundi lililodai kuhusika, lakini mashambulizi ya aina hii ni ya kawaida katika maeneo ya kaskazini-kati na kaskazini-magharibi mwa Nigeria, ambapo makundi yenye silaha, yanayojulikana kienyeji kama “majambazi”, mara nyingi huvamia vijiji, kuwateka nyara wakazi, na kufunga barabara kuu.

Mwezi Juni, zaidi ya watu 100 waliuawa katika shambulio sawa na hili katika eneo hilo.

Mamlaka zimesema kuwa vikosi vya usalama vilitumwa eneo la tukio mara baada ya mauaji ya Jumanne. Kamishna wa jimbo la Katsina, Nasir Mu’azu, alieleza kuwa wahalifu mara nyingi hutumia mashamba wakati wa msimu wa mvua kujificha, kisha kuzindua mashambulio ya ghafla.

Nigeria imekumbwa na ongezeko la machafuko katika miaka ya karibuni, yakiyagusa kwa pamoja makundi ya Waislamu na Wakristo. Mashirika ya haki za binadamu yameendelea kuikosoa serikali kwa kushindwa kudhibiti umwagaji damu, yakitaja matukio ya mauaji ya halaiki katika majimbo kama Benue kusini-mashariki, ambako karibu watu 200 waliripotiwa kuuawa katika tukio moja mapema mwaka huu.

3494329