Mfungamano wa Hija na Imani ya Nabii Ibrahim

IQNA – Qur’ani Tukufu inawakumbusha Watu wa Kitabu (Ahlul Kitab), wanaojinasibu kuwa wafuasi wa Nabii Ibrahim (AS), kuwa ikiwa madai yao ni ya kweli, basi wanapaswa kuamini msingi wa Ibrahimu katika ujenzi wa Kaaba na kuitambua kama Qibla (eneo la kuelekea wakati wa swala) ya kweli ya Mwenyezi Mungu.

Kabla ya aya zinazozungumzia Hija katika Surah Aal Imran (aya ya 96-97), kuna aya ya 95 inayosema: Sema: Mwenyezi Mungu amesema kweli. Basi fuateni mila ya Ibrahim mwongofu, wala hakuwa miongoni mwa washirikina.

Hii ina maana kwamba wanapaswa kufuata dini safi ya Nabii Ibrahim ambayo ni imani iliyojengwa juu ya msingi wa Tawhidi (umoja wa Mwenyezi Mungu) na isiyo na chembe ya ushirikina.

Katika tafsiri ya uhusiano huu, imeelezwa kuwa moja ya vielelezo vya wazi vya kufuata mila ya Ibrahimu ni kuutukuza Kaaba kama Qibla (kuelekea kuswali) na kituo cha mahujaji. Hivyo basi, aya tukufu ya 96 ya Surah Aal Imran inaanza kwa maneno: "Hakika Nyumba ya kwanza kuwekwa kwa ajili ya watu ni ile iliyoko Bakkah..." mara baada ya kutajwa kwa utii kwa Ibrahimu (AS), kwa lengo la kuwaelekeza Watu wa Kitabu, hasa Mayahudi, wanaodai kuwa wafuasi wa Ibrahim, kwamba ikiwa wanadai kwa dhati, basi wanapaswa kuamini kuwa Kaaba ndiyo Qibla ya Ibrahimi na ya kweli.

Kwa hakika, Qur’ani inajibu mashaka yaliyotolewa na Watu wa Kitabu wakati wa mwanzoni mwa Uislamu. Walikuwa na mashaka makubwa mawili:

1.   Walikataa wazo la kufutwa kwa hukumu za Mwenyezi Mungu (naskh), na waliona kubadilishwa kwa Qibla kutoka Jerusalemu (al-Quds) kwenda Kaaba kuwa ni batili.

2.   Walidai kwamba Waislamu wanadanganya kwa kudai kuwa Kaaba ni Qibla ya Nabii Ibrahim (AS).

Qur’ani Tukufu inatoa majibu ya wazi kwa mashaka haya mawili: Kwanza, kufutwa kwa baadhi ya hukumu (naskh) katika sheria ya Mwenyezi Mungu kunaruhusiwa na ni jambo la hekima linalolingana na hali za wakati. Pili, hata kabla ya Suleiman (AS) kuijenga Bayt al-Maqdis, Nabii Ibrahimu (AS) tayari alikuwa ameshaiweka Kaaba kama Nyumba ya Mwenyezi Mungu. Kwa hivyo, Qibla ya Waislamu ni ile ya asili ya Ibrahim, na ndiyo mwelekeo sahihi wakati wa ibada ya Swala katika kutii amri Mwenyezi Mungu.

Kwa hiyo, kuelekea Kaaba si kwenda kinyume na sheria ya Mwenyezi Mungu bali ni kurejea kwenye asili ya dini, njia ya manabii na sunna ya rafiki wa Mwenyezi Mungu, Nabii Ibrahimu. Ni Qibla ambako Tawaf hufanyika wakati wa Hija, ibada huonyeshwa kwa uwazi, na alama za Tawhidi na kumbukumbu ya Khalilullah (Ibrahim) hujitokeza wazi.

3493342