Mwanazuoni: Bibi Fatima ni Mfano Hai wa Maana ya Qur’ani ya ‘Kawthar’

IQNA – Mwanazuoni mmoja amesema kuwa Bibi Fatima al-Zahra (AS) ndiye dhihirisho halisi la maana ya “Kawthar” kama ilivyoelezwa katika Qur’ani Tukufu, akimtaja kuwa ni chemchemi ya baraka za kiroho na maarifa ya kijamii, ambaye athari yake inaendelea kuunda fikra za Kiislamu hadi leo.

Akizungumza na Shirika la Habari za Qur'ani la Kimataifa (IQNA), Hujjatul-Islam Morteza Daneshmand, mtafiti katika Taasisi ya Sayansi na Utamaduni wa Kiislamu mjini Qom, alieleza kuwa neno la Qur’ani “Kawthar” , linalopatikana katika Surah al-Kawthar , linamaanisha “chanzo cha kheri tele.”

Akasema: “Zaidi ya tafsiri ishirini zimetolewa kuhusu Kawthar, lakini kwa kuzingatia kinyume chake na neno abtar pamoja na sauti ya faraja ya surah hiyo kwa Mtume Muhammad (SAW), mfano wa wazi kabisa wa Kawthar ni Bibi Fatima al-Zahra (AS).”

Daneshmand alibainisha kuwa kwa upande wa lugha, Kawthar lina uhusiano na dhana ya mtiririko wa kudumu na utoaji: “Neno hili linamaanisha kitu ambacho asili yake ni wingi. Kama chemchemi inayotiririka na kuhuisha, Fatima (AS) alikuwa ni chanzo cha uhai wa kiroho, kiakili, na kimaadili.”

Akalinganisha Kawthar na takathur, yaani tamaa ya mali ya kidunia, akieleza kuwa Kawthar huzaa ukuaji na ukarimu, ilhali takathur hupelekea upotevu na uchu. “Mtu aliyebarikiwa kwa Kawthar huweza kutumia hata rasilimali ndogo kwa ufanisi mkubwa,” alisema.

Akigeukia nafasi ya kijamii na kielimu ya Bibi Fatima, Daneshmand alimwelezea kama “kielelezo cha uongozi wa vipengele vingi.” Ingawa nafasi zake za kifamilia kama binti, mke, na mama zinajulikana sana, alisisitiza kuwa “pia alikuwa na mchango mkubwa wa kielimu, kijamii, na kisiasa ambao bado haujachunguzwa kwa kina.”

Daneshmand aliongeza kuwa Fatima (AS) pia alikuwa “mfasiri makini wa Qur’ani Tukufu,” aliyekuwa na uwezo wa kufumbua maana za ndani na kuzihusisha na hali halisi za kijamii za wakati wake.

Akanukuu hotuba yake maarufu alipohoji kunyimwa urithi wake: “Ewe mwana wa Abu Quhafah! Je, Mwenyezi Mungu amekuamrisha urithi kutoka kwa baba yako lakini mimi nimezuiwa urithi kutoka kwa baba yangu? Je, kwa makusudi mmeacha Kitabu cha Mwenyezi Mungu?”

Akamwelezea zaidi kuwa “mkosoaji mkubwa wa kuporomoka kwa jamii,” aliyesema wazi dhidi ya mfumo wa utawala na hali ya kutojali ya watu. “Urithi wake,” alihitimisha, “ni taswira hai ya kauli ya Mtume (SAW): ‘Binti yangu Fatima ni kiongozi wa wanawake wa walimwengu.’”

3495282