Hafla ya usomaji wa Qur’ani katika Haram ya Imamu Ali (AS)
Hafla hiyo iliandaliwa chini ya Idara ya Mfawidhi wa haram hiyo, ikiwa ni miongoni mwa shughuli za Tamasha la 18 la Ifaf (Staha), linaloadhimisha kumbukumbu ya kuzaliwa kwa Bibi mtukufu Fatima Zahra (SA).
Alaa Mohsen, mkuu wa Kituo cha Dar-ul-Qur’an cha idara hiyo, alisema kuwa kikao hicho kilihudhuriwa na magwiji mashuhuri wa qira’a, akiwemo Jalal al-Bahadli, Alaa al-Karbalai, na Taqi Shukri.
Hafla hiyo ilijumuisha vipindi mbalimbali, na katika baadhi ya sehemu zawadi zilitolewa kwa mahujaji na wageni wa haram hiyo kwa niaba ya idara hiyo.
Tamasha la kila mwaka la Ifaf hujumuisha shughuli nyingi zinazofanyika Najaf kwa muda wa wiki moja kila mwaka, sambamba na maadhimisho ya kuzaliwa kwa Bibi Zahra (SA). Shughuli hizo hujumuisha vipindi maalumu kwa wanawake, programu za kitamaduni na kijamii, pamoja na matukio mahsusi kwa watoto.
Siku ya 20 ya mwezi wa Jumada al-Thani katika kalenda ya Hijria, ambayo mwaka huu inaangukia Alhamisi, Desemba 11, ndiyo siku ya kuzaliwa kwa binti mpenzi wa Mtume Mtukufu (SAW). Siku hii pia huadhimishwa kama Siku ya Mwanamke na Siku ya Mama.
3495695
