Chuo cha Kiislamu cha Imam Baqir (AS) Chafunguliwa Nigeria

IQNA – Chuo cha elimu ya Kiislamu kwa jina la Chuo cha Imam Muhammad Baqir (AS) kimefunguliwa rasmi katika mji wa Qani, nchini Nigeria.

Chuo hiki kimeanzishwa na Kituo cha Kimataifa cha As’hab al‑Kasa, ambacho kinafanya kazi chini ya usimamizi wa Taasisi ya Kusimamia Haram Tukufu ya Imam Hussein (AS) nchini Iraq.

Uzinduzi wa chuo hicho ulifanyika katika hafla rasmi iliyohudhuriwa na wawakilishi wa kituo hicho pamoja na walimu na wahudumu wa elimu.

Sheikh Ahmed Rashid al‑Tarfi, mkurugenzi wa Kituo cha As’hab al‑Kasa, alisema katika hafla hiyo kuwa chuo hiki kimefunguliwa katika muktadha wa programu za kielimu na kitamaduni za Astan, kwa lengo la kupanua shughuli za elimu katika nchi za Afrika.

Aliongeza kuwa kuanzishwa kwa chuo hicho kunalenga kuendeleza utamaduni halisi wa Kiislamu na kukuza kizazi chenye ufahamu wa mafundisho ya dini, kilichoelimika, na kilichojikita katika maadili ya kiroho na mwenendo mwema.

Sheikh al‑Tarfi pia amesisitiza kuwa chuo hiki, kwa msaada wa walimu wenye uzoefu, kinatoa programu bunifu za kielimu, na kinaweka mkazo maalumu katika kuunganisha elimu ya kitaaluma na malezi ya kimaadili na kiroho, yanayotokana na maisha ya Mtume Mtukufu Muhammad (SAW) na Ahl‑ul‑Bayt (AS).

Habari inayohusiana:

• Wahifadhi Qur'ani wahitimu katika Shule ya Kiislamu ya Kaduna nchini Nigeria

 

 

Kwa mujibu wa taarifa hiyo, Kituo cha Kimataifa cha As’hab al‑Kasa kwa sasa kinatekeleza miradi kadhaa ya kielimu na kitamaduni katika nchi mbalimbali za Afrika na Asia, kwa lengo la kusambaza maarifa ya Kiislamu na kuimarisha utamaduni wa Kiislamu katika jamii hizo.

3496388/