Ni saa zipi zenye utulivu zaidi katika Msikiti Mtukufu wa Makka?
IQNA – Mahujaji wa Umra wanashauriwa kupanga ziara zao katika Msikiti Mtukufu wa Makka (Masjid al Haram) wakati wa vipindi vyenye msongamano mdogo.
Mamlaka za Saudi Arabia zinasema kuwa kupanga wakati kwa umakini kunaweza kuwasaidia waumini kusonga kwa urahisi zaidi kupitia Mataf na Masaa na kutekeleza ibada zao kwa wepesi zaidi.
Mamlaka Kuu ya Utunzaji wa Mambo ya Msikiti Mtukufu (Masjid al Haram) na Msikiti wa Mtume (Al Masjid An Nabawi) imesema viwango vya msongamano kwa kawaida huwa chini kati ya saa 4 usiku na saa 10 alfajiri, na tena kuanzia saa 3 asubuhi hadi saa 10 jioni.
Msongamano huwa wa wastani kuanzia saa 11 alfajiri hadi saa 2 asubuhi, huku kipindi chenye shughuli nyingi kikiwa kati ya saa 11 jioni na saa 3 usiku, kulingana na mamlaka hiyo.
Mamlaka hiyo ilisema kuwa kupanga mapema kunaweza kupunguza msongamano na kuboresha mzunguko ndani ya Msikiti Mtukufu, hasa katika Mataf, ambapo mahujaji huzunguka Al-Kaaba, na Masaa, ambapo hutekeleza Sa’i kati ya Safa na Marwa.
Pia iliwahimiza mahujaji kutumia huduma za kidijitali zinazopatikana na kufuatilia viashiria vya moja kwa moja vya msongamano kabla ya kuchagua wakati wa kutekeleza ibada zao.
3498651
