Maandamano Marib, Yemen kulaani matusi ya Kizayuni-Mmarekani dhidi ya Qur’ani Tukufu
IQNA – Wananchi katika mkoa wa Marib nchini Yemen wamefanya maandamano na matukio ya kulaani vitendo vya kuvunjiwa heshima Qur’ani katika nchi za Magharibi.
Maandamano hayo yalifanyika katika wilaya mbalimbali za mkoa wa Marib baada ya swala ya Ijumaa, yakilaani matusi ya mara kwa mara ya Kizayuni-Mmarekani dhidi ya Qur’ani Tukufu na matukufu ya Kiislamu.
Washiriki walipiga nara za kuonyesha ghadhabu dhidi ya kile walichokitaja kuwa ni shambulio dhidi ya moja ya alama takatifu zaidi za Uislamu. Walisisitiza kuwa vitendo hivyo ni shambulio la moja kwa moja dhidi ya thamani za kidini na za kibinadamu, na ni njama za kudhoofisha utambulisho na misingi mikuu ya Umma wa Kiislamu.
Washiriki walisema kuwa kushikamana na Qur’ani Tukufu na Mtume Muhammad (SAW) ndiko kunakotoa nguvu ya ustahimilivu na ushindi, wakielezea shambulio hilo dhidi ya Qur’ani kuwa ni kosa kubwa linalohitaji msimamo imara na jibu kali kutoka kwa Waislamu wote.
Washiriki walisisitiza kuwa mashambulizi dhidi ya matukufu ya Kiislamu yanahitaji kupingwa vikali kwani ni “mradi wa Kimarekani-Kizayuni”.
Taarifa iliyotolewa na waandamanaji hao imelaani vikali kuchomwa moto kwa nakala za Qur’ani Tukufu, ikielezea kuwa ni kitendo cha makusudi cha kulenga matukufu ya Kiislamu na sehemu ya kampeni endelevu dhidi ya Uislamu na Waislamu.
Taarifa hiyo pia imekosoa kile ilichokiita “ukimya” wa wanachuoni wa Kiislamu, serikali, na watu kwa ujumla kufuatia mashambulizi dhidi ya Qur’ani, ikisisitiza umuhimu wa kurejea kwenye Qur’ani, kuiheshimu, na kushikamana na mwongozo wake.
Taarifa hiyo imeonyesha uungaji mkono kwa mbinu ya “mzingiro kwa mzingiro” inayotekelezwa na Jeshi la Yemen dhidi ya Saudia, huku ikitoa wito wa kuendeleza uhamasishaji na utayari wa umma katika ngazi mbalimbali.
Pia imehimiza ushiriki mpana katika shughuli za kuadhimisha kuzaliwa kwa Mtume (SAW), ikiwemo kupamba misikiti, nyumba, na mitaa, kuandaa mipango ya hisani, na kuwajali watu maskini na wahitaji.
Taarifa hiyo imesisitiza kuwa kukabiliana na matusi dhidi ya Qur’ani Tukufu na kutafsiri msimamo huo katika hatua za kivitendo inapaswa kubaki kuwa miongoni mwa mada kuu za shughuli za kuadhimisha kuzaliwa kwa Mtume, pamoja na maandamano.
3498645
