"Əhqaf" surəsində Allahı və qiyamət gününü inkar edənlərin sonu
Qurani-Kərimin qırx altıncı surəsi “Əhqaf” adlanır. Məkkə surələrindən sayılan bu surə İslam Peyğəmbərinə (s) nazil olan altmış altıncı surədir. Əhqaf 35 ayədən ibarətdir. O, 26-cı cüzdə yerləşdirilmişdir.
Ad qövmünün, yəni Həzrət Hudun (ə) qövmünün hekayəti və diyarından bəhs edən 21-ci ayədə bu kəlmənin işlənməsinə görə bu surə "Əhqaf" adlandırılmışdır. Həzrət Hud (ə) "Əhqaf" torpağında öz qövmünü (Ad) Allahın əzabından xəbərdar etdi. Bu xalqın torpağı qumludur və Əhqaf qumlu deməkdir. Bu söz Quranda yalnız bir dəfə zikr edilmişdir.
“Əhqaf” surəsində qiyamət günü və oradakı mömin və kafirlərin mövqe və məqamlarından, dünyanın yaradılışının əbəs olmadığından bəhs edilir. Həmçinin Allahı ölüləri diriltməyə qadir olan kimi tanıtdırır. Bu surədə valideynlərə yaxşılıq etmək tövsiyə olunur. Hədislərdə qeyd olunur ki, bu surənin 15-ci ayəsi İmam Hüseyn (ə) haqqında nazil olmuşdur. Bu surəni oxumağın fəziləti barədə rəvayət edilmişdir ki, hər kim bu surəni hər gecə və ya hər cümə günü oxuyarsa, Allah ondan dünya qorxusunu götürər, həmçinin onu Qiyamət qorxusundan qoruyar.
Bu surənin məqsədi Allaha, Onun Elçisinə və qiyamətə iman gətirməyə dəvəti rədd edən müşriklərə xəbərdarlıq etməkdir. Bu xəbərdarlıq onu inkar edənlər üçün şiddətli cəzanı, ondan çəkinməyi ehtiva edir. Bu səbəbdən də bu surə qiyamətin dəlili ilə başlayır və surənin sonuna qədər bu məsələni dəfələrlə qeyd edir.
Bu ayələrdə Allahın birliyinə və nübüvvətə dəlil gətirilr. Həmçinin Hudin (ə) qövmünün və Məkkə ətrafındakı kəndlərin viran edilməsinə işarə edilir. Bu vasitə ilə camaata xəbərdarlıq edir. O, həmçinin xəbər verir ki, cin dəstəsindən bir neçə nəfər Allah Rəsulunun (s) yanına gəlib, Quran ayələrini eşitdikdən sonra ona iman gətiriblər. Daha sonra öz qövmlərinə xəbərdarlıq etmək üçün onların yanına qayıdıblar.
Məkkə müşrikləri özlərini qüdrətlərinin zirvəsində görüb, Peyğəmbərin (s) dəvətini qəbul etməyə ehtiyaclarının olmadığını düşünürdülər; Buna görə də bütpərəstliyi təbliğ edərək, insanları azdırmaqla yanaşı, istehza ilə İslamın həqiqətini və Quran təlimlərini inkar etdilər. "Əhqaf" surəsi Qureyşin kafir və müşriklərinə xəbərdarlıq etmək, onlara bu yolu davam etdirmələri surətində dünya və axirətdə fəlakətli sonluqla nəticələnəcəyini xatırlatmaq üçün nazil edilmişdir. Həmçinin batil yolunda getməyin və Peyğəmbərin (s) doğruluğuna əhəmiyyət verməməyin və Qiyamət gününü inkar etməyin onlar üçün dünyada uğursuzluq və axirətdə zillətdən başqa bir nəticəsi olmayacağını xatırlatmaq üçün nazil olmuşdur. Onların itaətsizliklərinin müalicəsi ancaq Qiyamət gününün ağrılı əzabını xatırlamaqla mümkün olduğundan, surənin bir neçə ayəsində qiyamət və kafirlərin əzabı və cəhənnəm oduna atılmaq mövzusu vurğulanır.
