"Tövbə", Allahın adı olmadan başlayan surədir
"Tövbə" və ya "Bəraət" surəsi Qurani-Kərimin 129 ayədən ibarət doqquzuncu surəsidir. Onuncu və on birinci cüzlərə daxil olan Mədinədə nazil olmuş surələrdən biri də "Tövbə" surəsidir. Nazil olma sırasına görə, Peyğəmbərə (s) nazil olan yüz on dördüncü (sonuncu) surədir.
"Tövbə" sözü ərəbcə qayıtmaq, Qurani Kərimdə isə günahdan Allaha qayıtmaq deməkdir. Bu surənin belə adlandırılması onun çoxsaylı ayələrində tövbədən bəhs edilməsinə görədir. Bu surənin ən mühüm xüsusiyyətlərindən biri də onun "Bismillahir-Rəhmanir-Rəhim" olmadan başlamasıdır. Təfsirçilər bunun müxtəlif səbəblərini qeyd ediblər. O cümlədən:
- "Bismillahir-Rəhmanir-Rəhim" rəhmət və aman vermə ayəsidir. "Tövbə" surəsi isə amanı aradan götürmək üçündür.
- İbn Abbasın rəvayətində gəlib ki, Osman dedi: "Peyğəmbər (s) bu iki surənin yeri haqqında danışmamışdır.Biz bu iki surəni də Mədinədə nazil olduğu və mövzuları eyni olduğu üçün ardıcıl olaraq gətirdik.
- Peyğəmbərin səhabələri bu ayələri heç vaxt "Bismillah" ilə eşitməmişdilər.
- Bu surə "Ənfal" surəsindən sonra nazil olub və hər ikisi bir surə sayılır.
Bu surənin əsas mövzusu tövbə məsələsidir. Həqiqi tövbə və şirkdən imana qayıtmaq üçün həll yollarını nəzərdən keçirir. Namaz, zəkat və cihad kimi məsələlərə diqqət yetirir.
"Tövbə" surəsi müşrik və münafiqlərlə əlaqəni kəsmək əmri verir. Amma tövbə yolunu onlar üçün açıq qoyur. Bu surə möminlərə buyurur ki, İbrahim peyğəmbər (ə) atasından uzaqlaşdığı kimi, siz də ətrafınızdakı müşriklərdən uzaq durun.
"Tövbə" surəsinin digər mövzusu budur ki, "Zirar" məscidinə işarə edir. "Zirar" məscidi münafiqlər tərəfindən müsəlmanları parçalamaq üçün tikilmiş və Peyğəmbərin əmri ilə dağıdılmış məsciddir.
