"Tur" surəsində ilahi cəza və nemətlərin təsviri
Qurani-Kərimin əlli ikinci surəsi “Tur” adlanır. 49 ayədən ibarət bu surə Qurani-Kərimin 27-ci cüzündədir. O, Məkkə surələrindən biridir. Peyğəmbərə (s) nazil olan yetmiş altıncı surədir.
Bu surənin birinci ayəsində “Tur”a and içilir və ona görə də bu surə “Tur” adlanır.
"Tur Sina" Fələstin torpağında yerləşən müqəddəs dini yerlərdən biridir. Həzrət Musa (ə) həmin dağda Allahla danışırdı və ona vəhy gəlirdi. “Tur” adı Quranda on dəfə işlədilir.
"Əl-Mizan" təfsirinə əsasən, “Tur” surəsində əsas diqqət haqqa qarşı çıxanların təhdid edilməsidir. Bu surə kafirləri Qiyamət günü onlar üçün nəzərdə tutulan əzabdan qorxutmuşdur. Həmçinin and içərək həmin əzabın baş verəcəyini qəti şəkildə bildirmişdir. Daha sonra surədə ümumi və ayrılmaz bir əzab olan həmin əzabın bəzi xüsusiyyətləri bəyan edilir; Digər tərəfdən, cənnət nemətlərindən bəzilərini təsvir etmişdir. Bunlar o kəslərdir ki, dünyada gözəl rəftar edib, yalnız Allaha iman gətirmişlər.
“Tur” surəsinin məzmununu altı hissəyə bölmək olar.
Surənin bir neçə and içməklə başlayan ilk ayələrində ilahi əzab və qiyamətin əlamətləri, cəhənnəm atəşi və kafirlərin əzabından bəhs edilir.
Bu surənin başqa bir hissəsində müttəqiləri gözləyən cənnətdəki ilahi nemətlərdən bəhs edilir və onların hamısına işarə olunur.
O, həmçinin İslam Peyğəmbərinin (s) nübüvvətindən bəhs edir və düşmənlərinin səsləndirdiyi ittihamlara qısa cavab verir.
Bu surədə diqqət çəkən başqa bir mövzu da tövhid və Allahın birliyi, bunun güclü və aydın dəlillərlə sübut edilməsidir.
Bir daha qiyamət məsələsi və Qiyamət gününün bəzi xüsusiyyətlərini qeyd edir. Sonda İslam Peyğəmbərinə (s) səbir, əzmkarlıq, Allaha həmd etmək baxımından göstərişlər verir. Allahın ona dəstəyi vədi ilə keçmiş məsələləri qeyd edir.
