Sanaa ya Qur'ani Iran ni marejeo ya kufundishia Sanaa ya Qur’ani nchini Algeria

IQNA – Mtaalamu wa Sanaa ya kung'arisha (illumination) kutoka Algeria amesema Iran ndiyo mamlaka kuu juu ya sanaa za Kiislamu, akiongeza kuwa nchini Algeria, vitabu vingi vya sanaa vya Kiirani vinatumika kufundishia na kufanya mazoezi ya sanaa za mapambo.

Amal Dhayfallah alitoa maelezo hayo katika mahojiano na IQNA wakati wa Maonyesho ya 32 ya Kimataifa ya Qur’ani Tukufu ya Tehran.

Sanaa hizi zimesambaa kutoka Iran hadi nchi nyingine za Kiislamu, alisema. "Sanaa za Kiislamu zimeendelea sana nchini Iran, na nchini Algeria, tunatumia vitabu vingi vya sanaa vya Kiirani kwa kufundishia na kufanya mazoezi ya sanaa za mapambo."

Nchini Algeria, kuna msisitizo maalum juu ya sanaa za Kiislamu, haswa sanaa za Qur’ani, ikiwa ni pamoja na kaligrafia ya Qur’ani, mapambo na kung'arisha hati, pamoja na jildi za Qur’ani, alieleza, akiongeza, "Algeria imefanya juhudi kubwa katika eneo hili."

Akizungumzia shughuli zake za kisanii, alisema, "Mimi ni mhandisi wa usanifu na mtaalam wa vitu vya kale na sanaa za Kiislamu, haswa mapambo ya Kiislamu. Nimeshiriki katika maonyesho mengi ya kimataifa, ikiwa ni pamoja na yale yaliyofanyika Jordan, Iraq, Dubai, Sharjah, Morocco, Uturuki, na Algeria.

"Nina kazi nyingi za kisanii zinazohusiana na Qur’ani Tukufu, ikiwa ni pamoja na uandishi wa hati kadhaa za Algeria. Pia nimetunukiwa heshima ya kuandika aya za Qur’ani katika baadhi ya maonyesho makubwa zaidi duniani, ikiwa ni pamoja na Algeria."

Alipoulizwa kuhusu maonyesho ya Qur’ani ya Tehran, alisema, "Alhamdulillah, maonyesho ni mazuri sana na yamejaa uhai, yakivutia wageni wengi. Pia tunafurahi sana kushiriki katika maonyesho haya."

Kuhusu kaulimbiu ya maonyesho hayo, yaani "Qur’ani; Njia ya Maisha", alisema kaulimbiu hii ni nzuri sana kwani, kwa hakika, Qur’ani ndiyo kiini cha maisha yenyewe. "Mtu yeyote anayepuuza Qur’ani na Kitabu cha Mungu hatakuwa na maisha yenye heshima, kwa sababu Qur’ani ndiyo chanzo cha uwepo wetu."

Msanii huyo wa Algeria pia alielezea jinsi ya kuwasilisha fikra na mafundisho ya Qur’ani kwa kizazi kipya kupitia sanaa, akisema kwamba sanaa bila shaka ni moja ya zana muhimu zaidi za kusambaza fikra za Kiislamu zinazosaidia utambulisho wa kitaifa na kidini wa watu.

"Watu huanza kujifunza sanaa hizi kwa furaha, lakini baada ya muda, sanaa hizi huingia ndani ya roho ya mwanadamu."

3492259