Sweden yashinda Tuzo Kuu Katika Mashindano ya Ulaya ya Kuhifadhi Qur’ani

IQNA – Toleo la tatu la Mashindano ya Kimataifa ya Ulaya ya Kuhifadhi Qur’ani kwa washiriki wa umri mkubwa limehitimishwa mjini Rijeka, Croatia, ambapo Muhammad Abdi kutoka Sweden (Uswidi) alitwaa nafasi ya kwanza.

Othman Najdeh kutoka Lebanon na Barry Suleiman Abu Bakr kutoka Guinea walishika nafasi ya pili na ya tatu, kwa mtiririko huo, kama ilivyoripotiwa na Shirika la Habari la Qatar siku ya Jumanne.

Mashindano hayo yalifanyika chini ya uenyeji wa Kituo cha Kiislamu cha Utamaduni cha Rijeka na kuandaliwa na Jumuiya ya Kiislamu ya Croatia, yakiwakutanisha washiriki kutoka nchi 20 za Ulaya, Asia, na Afrika.

Tukio hili lilifanyika kwa ushirikiano na Mashindano ya Qur’an Tukufu ya Sheikh Jassim bin Mohammed bin Thani ya Qatar, ambapo Qatar ilitoa mchango mkubwa katika uratibu na usaidizi wa mashindano hayo.

Mashindano haya ni ya kipekee kwa kuwa yanawalenga mahafidh walio na umri wa zaidi ya miaka 35, na kuwapa jukwaa la kimataifa nadra kuonyesha juhudi zao za kudumu katika kuhifadhi Qur’ani hata katika hatua za baadaye za maisha. Kwa mujibu wa waandaaji, lengo ni “kuimarisha uhusiano na Qur’an Tukufu katika kila hatua ya maisha.”

Baada ya mashindano ya wazee, mashindano mengine ya vijana yaliyofahamika kama “Kizazi cha Qur’an” yalifanyika na kuvutia takriban washiriki 300 kutoka miji mbalimbali ya Croatia, yakihusisha tilawa za Qur’an, shughuli za kitamaduni, na ushiriki mkubwa wa jamii.

3493174