Mashindano ya Kuhifadhi Qur’ani Australia: Jukwaa la Kuwaenzi Wanafunzi na Wahudumu wa Qur’ani
Kwa mujibu wa ripoti ya SBS Arabic, mashindano hayo yanayojulikana kama Hafiz Al-Quran Competition yanachanganya uhifadhi wa Kitabu cha Mwenyezi Mungu, ustadi wa usomaji wake, na kuimarisha utambulisho wa Kiislamu miongoni mwa vizazi vipya — katika mazingira ya umoja na ushirikiano baina ya taasisi za elimu ya Qur’ani katika ngazi ya kitaifa.
Umuhimu wa mashindano haya hauko tu katika kuhamasisha uhifadhi wa Qur’ani Tukufu, bali pia katika kufufua utambuzi wa urembo wa lugha, maadili na maana za kiroho zilizomo ndani yake.
Mashindano ya Hafiz Al-Quran, yanayoandaliwa na Shule ya Kuhifadhi Qur’ani ya Msikiti wa Gungahlin mjini Canberra, ni miongoni mwa mipango bora zaidi nchini Australia katika sekta hii. Tangu kuanzishwa kwake miaka miwili iliyopita, mashindano hayo yamekua kuwa jukwaa lenye heshima ya kitaifa kwa kuwatambua na kuwaheshimu watu wa Qur’ani, huku yakionesha uzuri wa lugha na utukufu wa Qur’ani Tukufu.
Katika mahojiano na SBS Arabic, Ashhad Al-Sulhi, mmoja wa waandaaji wa mashindano hayo, alisisitiza umuhimu wa ubora wa kiufundi katika maandalizi na utekelezaji wa mashindano, akisema:
“Awali mashindano haya yalikuwa yakifanyika hapa Canberra pekee, siyo katika ngazi ya kitaifa. Mwaka huu ndiyo mara ya kwanza tuliamua kuyaandaa kwa kiwango hiki kikubwa. Tulitaka kuunganisha taasisi zote za elimu ya Qur’ani nchini Australia chini ya mwavuli mmoja ili kuimarisha ushirikiano kati yao.”
Aliongeza kuwa ushiriki wa wanazuoni wakubwa wa Qur’ani kama Muhammad Fouad Abdul Majid, mmoja wa majaji wakuu wa Qur’ani nchini Marekani, na Sheikh Al-Misrawi, ulisaidia mno kuinua viwango vya kitaalamu vya mashindano hayo.
Al-Sulhi alieleza kuwa changamoto kubwa ilikuwa kuboresha kiwango cha upangaji wa maswali na vigezo vya uamuzi kulingana na viwango vya kimataifa.
“Zaidi ya hayo, kipengele cha kiteknolojia kilikuwa muhimu sana. Timu yetu iliyojumuisha wataalamu wa akili bandia (AI) na mfumo wa taarifa za kidijitali ilifanya kazi kwa bidii kupunguza utegemezi wa kipengele cha kibinadamu na kufikia viwango vya juu vya uhaki na usahihi katika tathmini.”
Akasema:
“Timu yetu ni mchanganyiko wa wataalamu wengi wa AI na mifumo ya taarifa. Kwa juhudi zao, tuliweza kupunguza ushawishi wa binadamu katika majibu na tathmini. Tulitengeneza vigezo vya kudumu na tukachambua maswali yote ili kupata mifumo ya viwango vya kimataifa.”
Miongoni mwa mambo mazuri yaliyojitokeza katika mashindano ya mwaka huu ni ushiriki wa wanaume na wanawake kwa uwiano sawa, ambapo wanawake walifikia karibu asilimia 45 ya washiriki.
Hii, alisema Al-Sulhi, ni ishara chanya ya ukuaji wa idadi ya wanawake wanaojifunza Qur’ani na kupiga hatua kubwa katika taaluma ya usomaji na uhifadhi wake.
