Idhaa ya Cairo Kuanza Kurusha Kisomo cha Qur’ani cha Wanafunzi wa Al-Azhar

IQNA – Kisomo cha Qur’ani Tukufu kwa tarteel kilichorekodiwa na wanafunzi wa Kituo cha Kiislamu cha Al-Azhar nchini Misri kitaanza kurushwa hewani kupitia Idhaa ya Qur’ani ya Cairo kuanzia leo.

Redio hiyo imesema kuwa urushaji wa qiraa hii ni sehemu ya jukumu lake la kikanda na kimataifa, sambamba na maelekezo ya Rais wa Misri Abdel Fattah al-Sisi, kwa ajili ya maandalizi ya kuzindua tovuti ya kimataifa ya redio hiyo.

Taarifa kutoka Jumuiya ya Kitaifa ya Vyombo vya Habari ya Misri imeeleza kuwa Idhaa ya Qur’ani Tukufu itarusha kisomo hicho kila Jumapili saa 4 na robo usiku kwa saa za Cairo (22:15).

Ahmed Moslamani, Rais wa Jumuiya hiyo, amesema kuwa kisomo hiki kinaonesha nafasi ya uongozi wa Misri katika fani ya usomaji wa Qur’ani, pamoja na kuibuka kwa vipaji vipya na vya ubunifu miongoni mwa vijana.

Inafaa kutaja kuwa kisomo hiki cha tarteel kimeandaliwa kwa sauti za wanafunzi waliobobea katika usomaji wa Qur’ani, walioteuliwa kwa umakini mkubwa kupitia mchakato wa majaribio na mafunzo maalum.

Kabla ya kurushwa hewani, kisomo hicho kimepitiwa mara tatu na Kamati ya Mapitio ya Qur’ani ya Al-Azhar ili kuhakikisha usahihi wa kisomo na ufasaha wa matamshi ya herufi za Qur’ani Tukufu.

Maandalizi ya kisomo hiki yamechukua takriban miaka mitatu ya kazi ya kudumu, na kazi hii—yenye jumla ya saa 30 za video—inaunganisha uzuri wa sauti, ladha ya tarannum, na umahiri wa kanuni za tajwīd.

3495326