Mkutano wa Tabriz–Vienna kujadili mustakabali wa dunia na changamoto mpya za falsafa
Mkutano huu umeandaliwa na Chuo Kikuu cha Tabriz kwa kushirikiana na Ofisi ya Utamaduni ya Iran nchini Austria, na utafanyika kwa nusu siku kwa wakati mmoja mjini Tabriz na Vienna. Hii imeelezwa kuwa ni mara ya kwanza nchini Iran kuandaa mkutano wa aina hii unaowaleta pamoja wanafalsafa na wasomi mashuhuri kutoka mataifa mbalimbali.
Miongoni mwa wazungumzaji mashuhuri kutoka Ulaya, Marekani na Iran ni Slavoj Žižek, Frank Ruda, Jeremy Shearmur, Gholamreza Aavani, Donald Gillies, Robert Hanna, Maurice Hamington, Russell Sbriglia, Thomas Bauer, Thomas Heinscho na Hossein Dabbagh.
Waandaaji wamesema mkutano huu utatoa mihadhara ya kipekee na majadiliano ya moja kwa moja na wanafikra wakuu watakaotathmini changamoto za dunia na majibu ya falsafa kwa masuala hayo. Mada zitakazojadiliwa ni pamoja na:
- Mgogoro wa mazingira na mabadiliko ya tabianchi
- Teknolojia za kidijitali na akili mnemba
- Hadhi ya binadamu na dhana ya ulimwengu wa kijumla (cosmopolitanism)
- Mustakabali wa falsafa katika karne ijayo
Mkutano utapeperushwa moja kwa moja mtandaoni na utakuwa wazi kwa hadhira ya kimataifa kupitia kiunganishi cha mkutano wa mtandaoni. Makala zilizochaguliwa zitachapishwa katika toleo maalum la jarida la Philosophical Research la Chuo Kikuu cha Tabriz, linalochapishwa kwa lugha mbili.
Reza Gholami, mwambata wa utamaduni wa Iran nchini Austria, alisema kuwa Vienna, “mji mkuu wa mazungumzo ya kiakili,” inashirikiana na Chuo Kikuu cha Tabriz kuandaa majadiliano haya. Aliongeza kuwa ushiriki wa wasomi mashuhuri kutoka Iran na mataifa mengine unaufanya mkutano huu kuwa miongoni mwa matukio makubwa ya kifalsafa ya mwaka 2025 na kuipa Iran nafasi katika mijadala ya kifalsafa ya kimataifa.
Maelezo ya namna ya kushiriki yatapatikana kupitia tovuti za Chuo Kikuu cha Tabriz na Wisdom House Vienna:
literature.tabrizu.ac.ir/en
wisdomhouse.at
3495403
