Jinsi Istighfar Inavyoathiri Maisha ya Duniani

IQNA – Kuamini athari ya kiroho katika maisha hakumaanishi kupuuza nafasi ya sababu za kimaada, bali kunamaanisha kuwa sambamba na mambo ya kimaada, yapo pia mambo ya kiroho kama Istighfar (kuomba msamaha kwa Mwenyezi Mungu) ambayo yana athari.

Istighfar ina athari nyingi katika maisha ya dunia na Akhera. Athari za kiroho za Istighfar ziko wazi, lakini athari zake katika maisha ya kidunia zinahitaji ufafanuzi. Tabia ya mwanadamu inaweza kuwa na athari tatu: za moja kwa moja, zisizo za moja kwa moja, na zile zisizoonekana.

Katika mtazamo wa Kiislamu, matukio yote yanarudishwa kwa Muumba wake (Aya ya 109 ya Surah Aal-Imran; Aya ya 18 ya Surah Fatir) na yameumbwa kwa irada Yake kupitia “sababu”. Sababu hizi hazijazuiliwa kwa zile za kiasili pekee, bali zipo pia sababu za kiroho ambazo ziko nje ya upeo wa macho na maarifa ya binadamu, na zinaweza kufahamika tu kupitia mafundisho ya wahyi.

Kwa mujibu wa aya za Qur’an, kuna uhusiano maalum kati ya vitendo vya mwanadamu na mfumo wa uumbaji; kiasi kwamba kila mara jamii ya wanadamu inapofanya kazi kwa imani na matendo kulingana na mahitaji yake ya kimaumbile (fitrah), milango ya baraka hufunguliwa kwake. Lakini ikiharibu, hujiletea maangamizi (Aya ya 41 ya Surah Rum; Aya ya 96 ya Surah Al-A’raf; Aya ya 11 ya Surah Ar-Ra’d; na Aya ya 30 ya Surah Ash-Shura).

Sehemu kubwa ya uhusiano huu inaweza kueleweka, lakini baadhi yake yapo nje ya upeo wa maarifa ya binadamu. Katika Hadith Qudsi, Mwenyezi Mungu Mtukufu anaapa kwa heshima na utukufu Wake: “Hakuna mja anayependelea matakwa Yangu juu ya matamanio yake ila Mimi humjalia nafsi ya kutosheka, humfanya afikirie Akhera, na mbingu na ardhi huwa wadhamini wa riziki yake, na Mimi huwa mshirika wake katika biashara ya kila mfanyabiashara.”

Sehemu ya mwisho ya Hadith hii inaonesha kuwa biashara hii haina fujo, bali ipo chini ya mfumo unaoiongoza sokoni, ambao iwapo Mwenyezi Mungu atapenda, humfanyia mfanyabiashara manufaa.

Kwa hivyo, athari ya Istighfar katika ustawi wa kiuchumi (Aya ya 10-12 ya Surah Nuh) ni ya aina mbili; kwanza, Istighfar ya kweli si maneno ya kutamka msamaha pekee, bali zaidi ni ombi la kiutendaji la kujiepusha na ufisadi wa kimaadili na kitabia. Hivyo, sehemu ya athari za kiuchumi za Istighfar zinatokana na mageuzi ya mtazamo , jambo linalovutia wateja. Lakini maandiko ya kidini yanaonesha kuwa athari zake zisizoonekana ni za kina zaidi.

3495259