Ufyatuaji risasi waripotiwa nje ya Kituo cha Kiislamu cha York; mtu mmoja akamatwa, hakuna aliyejeruhiwa

IQNA – Jeshi la Polisi katika eneo la North Yorkshire, Uingereza, limemkamata mwanamume mwenye umri wa miaka 44 kufuatia tukio la ufyatuaji risasi nje ya Msikiti na Kituo cha Kiislamu cha York.

Polisi wamethibitisha kuwa hakuna mtu aliyejeruhiwa katika tukio hilo, huku uchunguzi wa kina ukiendelea kubaini mazingira yaliyozunguka tukio hilo la kuhuzunisha.

Kwa mujibu wa ripoti za vyombo vya habari vya Uingereza, ufyatuaji huo ulitokea nje ya msikiti uliopo Bull Lane, jijini York, siku ya Alhamisi. Kufuatia tukio hilo, Polisi wa North Yorkshire walimkamata mwanamume mzawa wa Uingereza kuhusiana na tuhuma za ufyatuaji huo.

Maafisa wa polisi wamesema silaha iliyotumika inaaminika kuwa ni ya hewa (air weapon), inayofanana na bunduki ya hewa. Mamlaka zilimfuatilia mshukiwa baada ya kuripotiwa kuondoka eneo la tukio kwa gari la rangi ya fedha, na baadaye kumweka chini ya ulinzi kwa ajili ya mahojiano.

Mshukiwa bado anashikiliwa na polisi huku uchunguzi ukiendelea. Polisi bado hawajathibitisha nia iliyosababisha tukio hilo, wakisema kuwa ni mapema mno kufikia hitimisho lolote kuhusu sababu za tukio hilo linalotia wasiwasi mkubwa.

Polisi wa North Yorkshire wameihakikishia Jumuiya ya Waislamu jijini York kuwa wanafanya kila juhudi kubaini ukweli wa mambo na sababu zilizopelekea tukio hilo. Mamlaka zimeahidi kuongeza doria katika maeneo ya msikiti, hususan nyakati za swala ambapo waumini hukusanyika.

Maafisa wa polisi pia wamesema watakutana na Imamu wa msikiti huo kama sehemu ya hatua za kuleta utulivu na kulinda usalama wa jamii. Mamlaka zimesisitiza kuwa usalama wa wakaazi na waumini ni kipaumbele kikubwa wakati uchunguzi ukiendelea.

Wachunguzi wametoa wito kwa mashahidi na wananchi wowote wenye taarifa kujitokeza. Watu wenye picha za CCTV, rekodi za simu, au picha za kamera za magari (dashcam) katika eneo hilo wameombwa kutoa ushirikiano ili kusaidia uchunguzi.

Tukio hilo limezua wasiwasi miongoni mwa Waislamu wa eneo hilo, ingawa polisi wamesisitiza kuwa uchunguzi bado uko katika hatua za awali. Mamlaka zinaendelea kukusanya ushahidi wote ili kubaini nia na mazingira ya ufyatuaji huo.

Polisi wa North Yorkshire wametoa wito kwa yeyote mwenye taarifa kuhusiana na tukio hilo kuwasiliana nao au kutoa maelezo kupitia kitengo cha Crime Stoppers ili kuwasaidia maafisa kukamilisha kazi yao.

3498489