Mashindano ya Qur'ani kwa wanafunzi wa Kiislamu huunganisha vyuo vikuu na maisha ya kiroho
Seyed Mohammad Mehdi Mostafavi, Naibu wa Mawasiliano na Masuala ya Kimataifa katika Ofisi ya Kiongozi Muadhamu wa Mapinduzi ya Kiislamu nchini Iran, alitoa kauli hiyo wakati wa kikao cha kwanza cha baraza la kutunga sera za toleo la saba la mashindano hayo.
Amesema kuwa kufanyika kwa vikao vya aina hii ni ishara ya umuhimu mkubwa ambao Jamhuri ya Kiislamu ya Iran inaupa uenezi wa utamaduni wa Qur’ani Tukufu .
Akisisitiza nafasi ya kipekee ya Qur’ani ndani ya mfumo wa Jamhuri ya Kiislamu ya Iran, Mostafavi alisema: “Hatufahamu nchi nyingine yoyote ambako viongozi wa mfumo mzima wa utawala wanajivunia kwa dhati kufahamu na kuishi kwa mujibu wa mafundisho ya Qur’ani.”
Akaongeza: “Hii inatupa fahari lakini pia inatubebesha jukumu kubwa, kwani macho ya mataifa mengi yako kwetu.”
Akitaja athari za kikanda na kimataifa za shughuli za Qur’ani za Iran, alisema: “Tunapaswa kuwa na uwezo wa kukidhi matarajio ya wale wanaosubiri kwa matumaini utekelezaji wa shughuli hizi katika Jamhuri ya Kiislamu, kwa kuandaa programu bora, zenye thamani ya kiroho na kielimu.”
Mostafavi alisisitiza kuwa Tume ya Maendeleo ya Shughuli za Qur’ani ya Jamhuri ya Kiislamu ya Iran iko tayari kikamilifu kushiriki katika maandalizi ya toleo la saba la Mashindano ya Kimataifa ya Qur’ani kwa Wanafunzi wa Kiislamu.
Alisema kuwa ushirikiano katika juhudi hizi utaendelea kwa nguvu, na akaeleza matumaini kuwa tukio hilo litakuwa hatua muhimu kuelekea katika kutimiza maono ya ustaarabu mpya wa Kiislamu.
Aidha, alibainisha kuwa mashindano haya yana malengo ya heshima, ambayo, kwa mapenzi ya Mungu, yatachangia kukuza mafundisho ya Qur’ani.
Mostafavi alieleza matumaini kwamba: “Kupitia mashindano haya, tunaweza kuleta mwangaza wa kiroho katika moyo wa taasisi za elimu ya juu.”
Mashindano haya yamekuwa yakiandaliwa tangu mwaka 2006 na Shirika la Qur’ani la Wasomi wa Iran, linaloongozwa na Akademia ya Elimu, Utamaduni na Utafiti ya Iran (ACECR , kwa lengo la kuimarisha umoja na mshikamano miongoni mwa wanafunzi wa Kiislamu duniani na kuinua kiwango cha shughuli za Qur’ani katika mazingira ya vyuo vikuu.
Toleo la mwaka huu linafuatia mafanikio ya mashindano sita yaliyotangulia, ambayo yalishirikisha washiriki kutoka zaidi ya nchi 85 na kuwa na athari kubwa katika kuhamasisha ushiriki wa Kiislamu na kiutamaduni kote ulimwenguni.
Toleo la sita la mashindano hayo lilifanyika katika mji mtakatifu wa Mashhad, kaskazini-mashariki mwa Iran, mwezi Aprili mwaka 2018.
4285906
