Tathmini ya awali ya Mashindano ya 7 ya Kimataifa ya Qur’ani kwa wanafunzi yakamilika

IQNA – Mchujo wa awali wa usomaji kwa ajili ya Mashindano ya 7 ya Kimataifa ya Qur’ani kwa Wanafunzi Waislamu umekamilika, ambapo kazi kutoka nchi 36 zimepitiwa.

Jumatatu, Agosti 18, qari mashuhuri na hakimu wa kimataifa kutoka Iran, Abbas Emamjomeh, alipitia mafaili 45 ya usomaji yaliyowasilishwa na washiriki wanafunzi kutoka nchi 36 katika hatua ya awali ya kipengele cha qiraa au usomaji.
Uhakiki huo ulifanyika katika Studio ya Mobin ya Taasisi ya Qur’ani ya Wanafunzi na Wasomi wa Iran jijini Tehran.

Akizungumza baada ya tathmini, Emamjomeh alibainisha upekee wa mashindano haya. Aliliambia IQNA kwamba mashindano haya hayana mfumo wa wazi wa umma ambapo washiriki wa umri na asili mbalimbali hushiriki.
Alisisitiza kuwa wanafunzi wa vyuo vikuu wana upatikanaji mpana wa rasilimali za mtandaoni na hivyo “wanaweza kuinua ubora wa usomaji wao kabla ya kuingia kwenye mashindano.”

Emamjomeh aliongeza kuwa kati ya mafaili yaliyopitiwa, wanafunzi kutoka nchi za Asia ya Kusini Mashariki na wawakilishi mmoja au wawili kutoka Misri walitimiza viwango vilivyotarajiwa. Pia alibainisha kuwa mashindano haya ni ya kimataifa na “kanuni zake lazima zifuate misingi na taratibu za mashindano ya kimataifa, ambazo haziwezi kupuuzwa.”

Kwa mujibu wa waandaaji, jumla ya video 55 ziliwasilishwa katika mchujo huu, ambapo 45 pekee ndizo zilizokidhi vigezo vya kushiriki. Washiriki walitakiwa kusoma kipande kilichoteuliwa ndani ya dakika tano kwenye video, kufuata kanuni zilizowekwa na mashindano ya Iran. Wenye alama za juu zaidi wataingia hatua inayofuata.

Mashindano ya Kimataifa ya Qur’ani kwa Wanafunzi Waislamu yanaandaliwa na Taasisi ya Qur’ani ya Wanafunzi na Wasomi wa Iran chini ya Akademia ya Iran ya Elimu, Utamaduni na Utafiti (ACECR). Mashindano haya yalizinduliwa mwaka 2006, na hadi sasa ndiyo mashindano pekee ya kimataifa ya Qur’ani yaliyo mahsusi kwa wanafunzi Waislamu.

Mbali na kipengele cha usomaji, pia kuna kipengele cha kuhifadhi Qur’ani nzima. Raundi ya awali ya kipengele hicho ilifanyika kwa njia ya mtandaoni kuanzia Julai 20 hadi Agosti 1, kwa ushiriki wa wanafunzi kutoka nchi 47.

Tarehe na mahali pa kufanyika kwa raundi ya mwisho yatatangazwa baadaye.

4300624