Mahmoud Al-Toukhi aikabidhi Idhaa ya Qur’ani Kuwait Tarteel yake

IQNA-Mahmoud Al-Toukhi, msomaji mashuhuri wa Qur’ani kutoka Misri, ametoa nakala ya usomaji wake wa Tarteel kwa Idhaa ya Qur’ani ya Kuwait.

Kupitia ukurasa wake binafsi wa Facebook, Al-Toukhi aliandika: “Namuomba Mwenyezi Mungu akubali matendo yangu na yenu mema na aifanye Qur’ani Tukufu kuwa mwombezi wangu na wenu Siku ya Kiyama.”

Alieleza kuwa Idhaa  ya Qur’ani ya Kuwait ilimwomba nakala ya Qur’ani iliyosomwa kwa sauti yake, na akawasilisha kwa ajili ya radhi za Mwenyezi Mungu. Al-Toukhi alisema kuwa anawapa wapenzi wa Qur’ani katika redio hiyo zawadi hii ili iweze kusikika na kufikiwa na wasikilizaji popote pale. Aliongeza kuwa anatolea usomaji huu kwa ajili ya radhi za Allah pekee bila kutarajia malipo ya kifedha, akitumaini kuwa Mwenyezi Mungu ataubariki na kuufanya kuwa sadaka endelevu yenye manufaa kwake na kwa Waislamu wote.

Katika mahojiano ya awali na tovuti ya Fito, Al-Toukhi alieleza kuwa kupungua kwa hadhi ya usomaji wa Qur’ani katika miaka ya karibuni kunatokana na sababu nyingi. Miongoni mwa sababu kuu ni hadhira inayokubali na hata kudai maonesho duni yenye ladha ya kibiashara. Alisema: “Msomaji anayewaridhisha wao huinuliwa juu, ilhali msomaji mwaminifu na mchamungu hupuuzwa. Hii ni hesabu ya ajabu, kitendawili na mgawanyo usio wa haki.”

Aidha, aliongeza kuwa sababu nyingine ni kukosekana kwa shule za jadi za Qur’ani (Maktab) vijijini. Al-Toukhi alisisitiza kuwa wengi wa wasomaji wakubwa wa zamani walihitimu kutoka Maktab za vijijini, ambapo walimu wao walijulikana kwa ujuzi mpana wa Qur’ani pamoja na msimamo thabiti na ukakamavu katika malezi ya wanafunzi.

349552