Baraza la Waislamu Ufaransa Lalaani Udhalilishaji wa Qur’ani Katika Msikiti

IQNA – Baraza Kuu la Waislamu Ufaransa (CFCM) limesema waumini wameshtushwa na kuumizwa sana baada ya mtu kuvamia msikiti ulioko kusini-kati mwa Ufaransa na kurarua nakala za Qur’ani Tukufu kisha kuzitupa chini.

Katika taarifa iliyotumwa kwenye mtandao wa X, CFCM liliandika: “Waislamu nchini Ufaransa wameshtushwa na kuumizwa sana na udhalilishaji wa nakala za Qur’ani, zilizoraruliwa na kutupwa chini na watu waliovamia msikiti mchana kweupe katika mji wa Le Puy-en-Velay, jimbo la Haute-Loire.”

Ingawa tukio hilo halikusababisha majeruhi, baraza hilo limeonya kuwa vitendo kama hivyo vinaweza kuongezeka katika mazingira yenye sumu yanayochochewa na tafiti, ripoti na mapendekezo yenye upendeleo dhidi ya Waislamu.

Baraza hilo liliongeza: “Udhalilishaji huu, uliolenga kitabu kitakatifu cha Waislamu ndani ya nyumba ya ibada, ni tendo kubwa la chuki dhidi ya Uislamu linalodhihirisha uhasama ambao haupaswi kudharauliwa.”

Siku ya Jumatano, Kituo cha Utamaduni cha Montreal-la-Cluse, kinachohusiana na jumuiya ya Kiislamu ya Kituruki (DITIB – Umoja wa Kiislamu wa Kidini wa Kituruki), pia kililengwa katika shambulio.

Katika taarifa yake, kituo hicho kilisema: “Risasi, ikionekana kuwa ya silaha, ilipatikana ndani ya kisanduku cha barua cha chama chetu. Tunalaani vikali shambulio hili linalolenga jamii ya Kituruki ya Montreal-la-Cluse na mazoea ya kuishi kwa mshikamano.”

3495594