Jaribio la kigaidi la kuchoma moto Chumba cha Sala cha Waislamu mashariki mwa Ufaransa

IQNA – Mamlaka za Ufaransa zimeanzisha uchunguzi kufuatia jaribio la kuchoma moto chumba cha kusalia cha Waislamu mjini Châtillon-sur-Seine, tukio ambalo maafisa wamelilaani kuwa ni kitendo cha kigaidi cha uoga na chenye chuki dhidi ya Uislamu.

Tukio hilo lilitokea jioni ya tarehe 14 Agosti, ambapo vipeperushi vya karatasi vilichomwa moto na kuwekwa mlangoni mwa chumba cha sala, kwa mujibu wa BFMTV. Wapita njia waliuzima moto haraka, na madhara yaliyobaki yalikuwa tu kuchomeka kidogo kwa mlango.

Polisi wa Montbard wameanzisha uchunguzi kwa kosa la “uharibifu wa makusudi kwa moto.” Hadi sasa hakuna mtu aliyekamatwa.

Roland Lemaire, meya wa mji huo, alieleza shambulio hilo kuwa ni kitendo cha jinai na “kisichokubalika,” akisema kwamba madhara yalikuwa madogo lakini nia yake ni ya kutisha, kwa mujibu wa La Dépêche.

Waziri wa Ndani wa Ufaransa, Bruno Retailleau, alilaani tukio hilo kupitia mitandao ya kijamii na kuonesha mshikamano na waathirika. “Usiku wa jana mjini Châtillon-sur-Seine, watu walijaribu kuchoma moto chumba cha sala cha Waislamu. Fikira zangu zipo na waumini walioguswa na kitendo hiki cha uoga kilichojaa chuki dhidi ya Uislamu,” aliandika kwenye X.

Mwakilishi wa jamii ya Waislamu wa eneo hilo alithibitisha kuwa malalamiko rasmi yatawasilishwa. Imeripotiwa pia kwamba matukio kama haya yamewahi kurudiwa miezi ya karibuni, jambo linaloongeza hofu ya malengo ya makusudi.

Mashirika ya haki za kiraia pia yamejibu. Baraza la Mahusiano ya Kiislamu–Kimarekani (CAIR) liliita shambulio hilo kuwa “lenye chuki” na likatoa onyo juu ya hali ya uhasama dhidi ya Uislamu barani Ulaya.

“Viongozi wa Ufaransa lazima waache kutumia maneno ya kisiasa yanayochochea na kutoa ujasiri kwa mashambulio ya aina hii yenye chuki,” alisema Ibrahim Hooper, mkurugenzi wa mawasiliano wa shirika hilo.

Jaribio hili la uchomaji moto linakuja wakati hofu ya vitendo vya chuki dhidi ya Uislamu au Islamophobia nchini Ufaransa ikiongezeka. Mamlaka za Ufaransa zimeripoti ongezeko kubwa la visa vya chuki dhidi ya Waislamu mwaka 2025. Kati ya Januari na Mei, visa 145 vilirekodiwa, ongezeko la asilimia 75 ikilinganishwa na kipindi kama hicho mwaka uliopita. Mashambulio kwa watu binafsi yaliongezeka zaidi ya mara tatu, kutoka 32 hadi 99, na sasa yanachukua sehemu kubwa ya kesi zote.

Mlipuko huu unafuatia matukio kadhaa makubwa, ikiwemo kuchomwa kisu na kuuawa kwa kijana wa Mali ndani ya msikiti kusini mwa Ufaransa mwezi Aprili. Mashirika ya haki na viongozi wa jamii wamesisitiza serikali ichukue hatua thabiti zaidi kupambana na ongezeko hili la mashambulio na hotuba za chuki dhidi ya Waislamu.

3494266