Madrassah za jadi za Qur'ani zaendelea kustawi Algeria

IQNA – Katika mkoa wa El Oued nchini Algeria, Sheikh al-Bashir Atili, mwalimu mkongwe wa Qur'ani katika Msikiti wa Tijaniyah mjini Bayadha, anaendelea kuhamasisha vizazi vipya vya wanafunzi kupitia mbinu ya kitamaduni ya kuhifadhi Qur'ani kwa njia ya diktei na kuandika kwa mkono.

Kwa zaidi ya miaka 30, Sheikh al-Bashir amekuwa akitumia zana kama wino, kalamu za mianzi, na vibao vya mbao—mbinu ambazo alirithi kutoka kwa baba yake na walimu wake. “Safari yangu ya kufundisha Qur'ani ilianza nikiwa mdogo, wakati baba yangu alitamani niwe hafidh wa Qur'ani,” alikumbuka, kwa mujibu wa vyombo vya habari vya ndani.

Mwishoni mwa miaka ya 1980, baba yake alimwandikisha katika madrasa iliyokuwa ikitumia vifaa vya msingi pekee kwa ajili ya kujifunza, vikiwemo ubao wa mbao na kalamu ya wino.

Sasa akiwa na wanafunzi takriban 250, wavulana na wasichana, Sheikh al-Bashir anahamasisha watoto walio chini ya miaka 15 kuandika aya za Qur’ani kwa mkono kwenye ubao mweusi.

“Mbinu hii husaidia kufunga maneno akilini na kuongeza uelewa. Inahitaji umakini wa hali ya juu, kwani mikono na akili vinakuwa vinatumika kwa pamoja,” alisema.

Amesisitiza umuhimu wa vipindi vya diktei, ambavyo huwazoesha wanafunzi kusikia na kurudia Qur'ani kwa usahihi. Makosa ya matamshi au maandiko hurekebishwa papo hapo, hivyo kuimarisha ujifunzaji.

“Mbinu hii huwafundisha wanafunzi kuandika maandishi ya Qur'ani, ambayo ni tofauti na maandishi ya kawaida, na husaidia pia katika uhifadhi bora na ufasaha,” aliongeza.

Ingawa hakatai matumizi ya zana za kisasa za kufundishia, Sheikh al-Bashir bado amejikita katika mbinu za kitamaduni, hasa kwa wanafunzi wa umri mdogo.

Wanafunzi wake wanaripoti kuwa mwanzoni walikuwa na ugumu kuzoea mbinu hizi, hasa kurudia kuandika mara kwa mara na hatua za kinidhamu zinazochukuliwa mara nyingine. Hata hivyo, wengi huanza kuzipenda mbinu hizo, na baadhi huendelea kuhudhuria madarasa yake hata baada ya kujiunga na vyuo vikuu au kuanza kazi.

Kwa mujibu wa wanafunzi wake, mbinu ya Sheikh al-Bashir husaidia si tu katika kuhifadhi Qur'ani, bali pia katika kuboresha mwandiko, tahajia, na ufasaha wa maelezo ya mdomo.

Kwa miaka mingi, amefundisha mamia ya walimu wa Qur’ani, watumishi wa misikiti, na wanafunzi, wa kiume na wa kike, akichangia pakubwa katika elimu ya Qur’ani katika eneo la Bayadha.

3493057