Wanafunzi wa Algeria watatumia likizo za majira ya baridi kuhifadhi Qur'ani
Wanafunzi wa Algeria watatumia likizo za majira ya baridi kuhifadhi Qur'ani
IQNA - Idara kadhaa za wakfu na masuala ya dini nchini Algeria zinafanya kazi ya kufungua tena shule za Qur'ani na Maktab (vituo vya jadi vya kusoma Qur’ani) wakati wa likizo za majira ya baridi ili kuruhusu wanafunzi kutumia muda huu kuhifadhi Qur'ani.
Idara ya Wakkfu na Masuala ya Dini katika Mkoa wa Blida ni miongoni mwa zile zinazofanya kazi ya kufungua shule za Qur'ani ili kuwakaribisha wanafunzi katika maeneo mbalimbali.
Mpango huu unalenga kuruhusu wale wanaopenda kutumia faida za likizo za majira ya baridi kujifunza na kuhifadhi Qur'ani.
Ikiwa shule hazitatosha, misikiti itatumiwa kwa mafunzo ya Qur'ani nje ya nyakati za swala.
Kamal Belassal, mkurugenzi wa idara ya masuala ya dini katika Blida, alisema kuwa wakati wa likizo za majira ya baridi, mpango wa kina umepangwa ili kumudu idadi kubwa zaidi ya watoto na vijana, kuwawezesha kufaidika na shule za Qur'ani, maktab au vituo vya elimu ya jadi ya Qur'ani ambavyo pia vinajulikana kama Zawaya.
Alisema vituo 697 vya Qur'ani, shule 92, na Zawaya sita zitakuwa zinafanya kazi kwa ajili ya kufundisha usomaji na uhifadhi wa Qur'ani katika mkoa huo.
Kufundisha Qur'ani ni moja ya programu zilizofanikiwa zaidi za kusaidia watoto na kutumia muda wao wa mapumziko kujifunza kuhusu imani yao, alisema Belassal.
Alisisitiza kuwa uzoefu umeonyesha kuwa wahifadhi wa Qur'ani ni wanafunzi wenye mafanikio na maadili.
"Tumefungua tena shule zote za Qur'ani kwa wanafunzi kutumia wakati wa likizo za majira ya baridi," aliongeza.
Pia alihimiza wazazi wa wanafunzi kuunda mazingira mazuri ya kushiriki katika vituo vya Qur'ani.
Alibainisha kuwa wahifadhi wa Qur'ani kutoka mikoa mingine wanaweza kutembelea vituo vya Qur'ani katika Blida kupata vibali vya kusoma.
Hii itaongeza uwezo wa wahifadhi na inaweza kuwasaidia kuwa washindani bora katika mashindano ya kitaifa na kimataifa ya Qur'ani, aliendelea kusema.
